Жамбылдық теміржолшылар бильярдтан Кәсіподақ кубогін сарапқа салды
"Қазақстан теміржолшысы" газетінің Жамбыл облысындағы меншікті тілшісі
Жамбылдық теміржолшылар арасында бильярдтан жарыс ұйымдастырылды. Кәсіподақ кубогін сарапқа салған турнир Тараз станциясында өтті. «Қазтеміржолкәсіп» ҚБ Жамбыл филиалының спорт нұсқаушылары бильярд ойыны – тиімді демалыстың бір түрі екенін айтады. Дегенмен, ең бірінші кезекте интеллектуалдардың бәсекесі. Қатысушылардың бірі қарсыласынан тактикасы жағынан басым түссе, тағы бірінің техникасы мықты. Мұндайда кездейсоқ сәттілік ойын тағдырын шешіп кетуі ғажап емес.
Қалай десек те, бильярдта – ойыншының төзімі мен дәлдігі, стратегиялық ойлау жүйесі сынға түседі. Есебі жақсы болмаса, соққан шарды қарсыласының «кезегінде» оңай ұпай ретінде жазып беруі де мүмкін.
Айналмалы жүйе бойынша өткен жарыста Шу станциясының машинист-нұсқаушысы Дінмұхаммед Байназаров кәсіподақ кубогін жеңіп алды. Екінші орынды ЭЧ – 21 Жамбыл электрмен жабдықтау дистанциясының электрмеханигі Темірхан Оралұлы олжалады. Үздік үштікті Тараз станциясының намысын қорғаған Нұрболат Сейілбек түйіндеді.
Жарыстың марапаттау кезеңінде жеңімпазға – кәсіподақ кубогі, жүлдегерлерге арнайы алғыс хаттар мен сыйлықтар тапсырылды.