Түлкібастағы тораптық жарыс

«Қазақстан темір жолы» ҰК» АҚ мен «Қазтеміржолкәсіп» ҚБ Жамбыл филиалының спорттық-бұқаралық іс-шаралары күнтізбелік жоспарына сәйкес, ПЧ – 52 Түлкібас жол дистанциясында әйелдер және ерлер арасында дартс пен дойбыдан тораптық жарыс өтті.

– Қоғамдық-бұқаралық сипатқа ие дартс ату – боулинг секілді ресми спорт түрі. Көп отбасы бос уақытты пайдалы әрі қызықты өткізу үшін осы ойын түрлерін таңдағанымен, ресми жарыстарда арнайы ереже, талаптарға сай өтеді. Біз дартс спортын турнирлер тізіміне қосқалы бері әйелдер арасында бәсеке күшейді, – дейді «Қазтеміржолкәсіп» ҚБ Жамбыл филиалының спорт бойынша нұсқаушы-ұйымдастырушысы Евгений Тян.  

Дартс атудан жеңімпаз атанған ПЧ – 52 жетекші инженер-экономисі Лаура Қазмағанбетова дартс тек хобби емес, дәлдік пен зейінділікті қажет ететін, шыдамдылықты шыңдайтын спорт түрі екенін айтады. Үздіктер қатарынан сондай-ақ, жетекші инженер Аяужан Өтегенова мен инженер-метролог Татьяна Гаенко да көрінді.  

Ал дойбы бәсекесінде жол монтері Мұрат Кәрімов 1-орынды жеңіп алды. Жетекші инженер-эколог Азамат Бердіқұлов 2-орыннан көрінді. Техник Дәулет Қуатбай үздік үштікті түйіндеді. Аймақтық спорт нұсқаушыларының айтуынша, қазір тораптық жарыстарда бәсеке күшейіп келе жатыр. Шағын футболдан Сарышаған станциясында өткен жарыс та тартысқа толы болыпты. Турнирге қатысқан 5 команданың ішінде ВЧДЭ – 27 Жамбыл вагон пайдалану депосының құрамасы жеңіс тұғырынан көрініп, ПЧ – 48 Сарышаған жол дистанциясының футболшылары 2 орынды еншілесе, 3- орынды ТД – 19 командасы жеңіп алған.  

Жарыс жүлдегерлері кубоктармен, грамоталармен, медальдармен марапатталып, кәсіподақ ұйымы атынан бағалы сыйлықтар табысталды.