Дойбышылар додасы
"Қазақстан теміржолшысы" газетінің Жамбыл облысындағы меншікті тілшісі
Тараз станциясында Жамбыл ЖТ және Жамбыл магистральдық желі бөлімшесіне қарасты мекемелер арасында дойбы, үстел теннисінен тораптық жарыстар өтті.
«Қазтеміржолкәсіп» ҚБ Жамбыл филиалы ұйымдастырған бәсеке тартысқа толы болды. Әсіресе шаршы тақта алдындағы дойбышылар додасында есебі мықтылар ешкімге есе жібермеуге тырысып бақты. Бұл ойында қарсыласының тактикасын болжап білмеген әп-сәтте «жүрісінен» жаңылып қалуы мүмкін.
Жол бойында апат бола қалған жағдайда санаулы минутта асай-мүсейін жинап жетіп баратын, темір жолдың «жедел жәрдемі» атанған ВП-35 Жамбыл қалпына келтіру пойызының бастығы Махат Байдалиев есепке жүйрік, тактикасы мықты екенін шаршы тақтадағы жарыста да дәлелдеп берді. Дойбышылар додасында қарсылас шақ келтірмей, жеңіске жетті.
Екінші орынды Тараз көліктегі оқу орталығының курсанты Шыңғыс Қосдәулет еншіледі. Үздік үштікті Тараз өрт сөндіру пойызының өрт сөндірушісі Мейіржан Аярбеков түйіндеді.
«Қазтеміржолкәсіп» ҚБ Жамбыл филиалының спорт бойынша нұсқаушы-ұйымдастырушысы Евгений Тян әуесқойлар мен кәсіпқой спортшылардың жарысының ережесі екі түрлі екенін түсіндірді. Ал екеуіне ортақ талап – ойынның тақ сан 11 ұпайға дейін жалғасатындығы екен.
– Тораптық жарыстарда оқу орталығы командасының қоржынына екі жүлде түсті. Дойбы ойынында курсантымыз финалға дейін жетіп, екінші орынды олжаласа, үстел теннисінен Қайрат Қоймағанбетов жеңімпаз атанды, – дейді Тараз көліктегі оқу орталығы кәсіподақ ұйымының төрайымы Гүлжан Ақназарова.
Үстел теннисі бәсекесінде екінші орынды ТЧЭ-31 Жамбыл локомотив пайдалану депосының машинисі Азамат Ысқақов иеленді. Ал ШЧ-36 Жамбыл белгі беру және байланыс дистанциясының шебері Асқар Ұлақұловтың еншісіне тигені – үшінші орынның жүлдесі. Жарыс жүлдегерлеріне кәсіподақ филиалы атынан грамоталар, медальдар мен бағалы сыйлықтар тапсырылды.
