Таразда теміржолшылар арасында спартакиада өтті
Тараз қаласындағы Теміржолшылар паркінде Жамбыл магистральдық желі бөлімшесі спорт нұсқаушыларының ұйымдастыруымен бұқаралық спортты дамытуға арналған спартакиада өтті. Спорттың 6 түрін қамтыған жарыс тартысты да қызықты өтуімен есте қалды.
Жарыс болған соң, біреу жеңіп, біреу жеңіледі. Бұл жолы да жарысқа қатысушылар жеңіс тұғырынан көрінуі үшін барын салды. Мәселен, дойбы ойынында ТЧЭ-31 кадр бөлімінің басшысы Сакен Имашев зеректігімен ерекшеленіп, бірінші орынды иеленсе, ШЧ-36 метрологы Данияр Қадырбек пен осы ұжымның электромеханигі Юрий Дзюба екінші, үшінші орындарды өзара бөлісті. Армрестлинг сайысында да ШЧ36 қызметкері Алмаз Есіркепов үздік шықса, ВЧДЭ-27 слесарі Нұрхан Тұрдалиев екінші орынды, вагон тексеруші Азамат Қолдасов үшінші орынды місе тұтты.
Зияткерлік ойын саналатын шахматта электромеханик Юрий Дзюбаның бағы жанды. Вагон қараушы Андрей Швалев пен Әліби Оспан алғашқы үштікке қосылды. Ұлттық ойынға жақын кір тасын көтеруде де Андрей Швалев ешкімге дес бермеді. Нұрхан Тұрдалиев пен Данияр Қадырбек бұл сайыста да екінші, үшінші орындарға қанағаттанды.
Дартс ойыны да өте тартысты өтті. Мұнда Асанәлі Оспан бірінші орынды иеленсе, Арсен Қалмахан екінші орынды, Салауат Асқар үшінші орынды алды. Ал арқан тартыста ТЧЭ31 ұжымынан жасақталған команда ешкімге есе жіберген жоқ. Содан соң ШЧ-36 командасы екінші тұғырға, ВЧДЭ-27 командасы үшінші тұғырға табан тіреді. «Жалпыхалықтық дене шынықтыруды, спортты ілгерілетуге бағытталған шаралар теміржолшылар арасында жиі өтетіні – құптарлық жайт. «Дені саудың - жаны сау» деген рас сөз. Бүгінгі спартакиада да біз үшін нағыз спорт мерекесі болды», – деп әсерімен бөлісті үздік ойыншылардың бірі Нұрхан Тұрдалиев.
Жеңімпаздар мен жүлдегерлер арнайы дипломдармен марапатталып, естелік сыйлықтар тапсырылды.