Шымкентте салауатты сенбілік өткізді
Шымкент қаласы бойынша меншікті тілшісі
Спорт – денсаулық кепілі екенін Шымкент бөлімшесінің теміржолшылары бір сәтке де ұмытқан емес. Күнделікті жұмыспен қатар, салауатты өмір салтын қатар ұстану теміржолшылар үшін дәстүрге айналғалы қашан.
Өткен сенбі, яғни 21 қыркүйек күні Арыс қаласындағы «Игібай» спорт кешеніне жиналған теміржолшылар мини футболдан, үстел үсті теннисінен, шахматтан жарыс өткізді. Жарысқа 6 команда қатысты. Атап айтқанда, Арыс станциясы, «ӘТЖК» АҚ Арыс СК, ПЧ-54, ШЧ-38, ТЧЭ-32, НЖС-9, барлығы 6 командадан жүзге жуық теміржолшы қатысқан жарыстың барлық түрінен ойын тартысты да қызықты өтті.
Мысалы, үстел үсті теннисінен ЭЧ-24 электрмонтері Шаншарбек Шекеровпен «ӘТЖК» АҚ Арыс СК күзетшісі Абай Шағырбаевқа тең келер ешкім болмады. Ал шахматтан суырылып озып шыққан ТЧЭ-32 командасы болды. Командаға бұл жеңісті машинист Саттар Баширов пен Павел Маньшин алып берді. Жарыстың ең тартысты бөлігі футбол алаңында өтті. Соңғы ойындарға дейін қай команданың жеңіске жететіні белгісіз еді, сонысымен де қызықты болды. Нәтижесінде, бірінші орынды мұнда да ТЧЭ-32 командасы, екінші орынды ШЧ-38, үшінші орынды «ӘТЖК» АҚ Арыс СК командалары өзара бөлісті. Спорттық іс-шараға қатысқан барлық теміржолшылар жарыс соңында бағалы сыйлықтармен және алғыс хаттармен марапатталды.