Еуразия кеңістігіндегі кеңес
М.Тынышпаев атындағы ALT Университеті базасында өткен Көліктегі қауіпсіздік және цифрландыру жөніндегі V Еуразиялық форум көлік саласындағы өзекті мәселелерді, инновациялық шешімдерді және цифрландыру үдерістерін талқылаған маңызды жиын болды.
Қозғалыс қауіпсіздігі және заманауи цифрлық шешімдер мен инновациялар бойынша негізгі мәселелерді қаузаған жиынның пленарлық сессиясына «KAZLOGISTICS» Қазақстан көлікшілер одағының Бас директоры Қанат Әлмағамбетов модераторлық етті. Шақырылған спикерлер арасында жетекші шетелдік және отандық көлік компанияларының, мемлекеттік органдардың, ҚР жоғары оқу орындарының, логистикалық және көліктік-коммуникациялық сала кәсіпорындарының өкілдері болды.
Оннан аса елден өкілдер қатысқан алқалы жиында теміржол саласын цифрлық трансформациялау, инновациялық технологиялар мен қауіпсіздік, көлік-логистикалық және коммуникациялық кешен үшін кадрлар даярлауды жетілдіру мәселелері талқыланды. Көлік саласының бірнеше бағыты бойынша 6 панельдік сессия өтті. Оның ішінде теміржол көлігіне қатысты «ҚТЖ» ҰК» АҚ Қозғалыс қауіпсіздігі департаментінің директоры Марат Шәкеновтің жеткшілігімен өткен «Теміржол көлігінде қозғалыс қауіпсіздігін қамтамасыз ету» сессиясы және «ҚТЖ» ҰК» АҚ «Бас есептеу орталығы» филиалы директорының орынбасары Серік Алатаев модераторлық еткен «Теміржол саласын цифрлық трансформациялау» сессиясы болды.
Панельдік сессияларға қатысушылар арасында өзекті мәселелерге қатысты қызу пікіралмасулар мен дискуссияға ұласқан талқылаулар өтті. Көлік қауіпсіздігі және цифрландыру саласындағы жаңа әзірлемелер мен тың шешімдердің негізін қалауға ықпал еткені анық.
«Теміржол саласын цифрлық трансформациялау» панельдік сессиясында бірнеше спикерлер мазмұнды да қызықты баяндама жасады. Әсіресе ресейлік мамандар жоғары белсенділігімен көзге түсіп, көпшіліктің назарын аударған тақырыптар төңірегінде ой бөлісті. Олардың қатарында Ресейдің «Теміржол көлігі ғылыми-зерттеу институты» АҚ Тасымалдау процесі мен логистиканы дамыту мәселелері жөніндегі бас директорының орынбасары М.И. Мехедов, Ресей көлік университетінің профессоры (МИИТ) П.В.Куренков, «Ақпараттық және көлік жүйелерінің ғылыми-өндірістік орталығы» АҚ Бас директорының орынбасары Ю.А.Седелкин, «РЖД-технология» ЖШҚ департаментінің басшысы П.В.Дыкун, ПРОМЭЛЕКТРОНИКА ҒӨО коммерциялық бөлімінің жетекші маманы А.Е. Малыгин, Ресей көлік университетінің «Интеллектуалды көлік жүйелері және технологиялары» ғылыми-білім беру орталығының бастығы, «Көлік процестерін басқарудың цифрлық технологиялары» кафедрасының меңгерушісі В.Е.Нутович, «ТимэБиг» ЖШҚ және теміржол, көліктік кеңес беру қауымдастығының цифрлық шешімдер жөніндегі сеньор-кеңесшісі В.А.Вирковский сынды өз ісінің мамандары болды.
Қазақстандық лекторлар қатарында ALSTOM Kazakhstan компаниясының клиенттермен жұмыс жөніндегі директоры Б.Қ.Котырев, «Dosjan temir joly» АҚ Басқарма төрағасының өндіріс жөніндегі орынбасары Н.С.Әділбаев, «Жолаушылар тасымалы» АҚ технологиялық қолдау департаментінің бас менеджері А.Р.Мелдебекова, «DAR RAIL» ЖШС Бас директоры Р.Т.Дюсенов, «KTZ EXPRESS» АҚ стратегиялық даму және ақпараттық технологиялар жөніндегі басқарушы директоры М.А.Садықов, «Мұхамеджан Тынышпаев атындағы ALT Университеті» АҚ сениор-лекторы М.Б.Орунбеков ұсынған баяндамалар түрлі пікірлер туғызып, қызу талқылауға ұласты.
– Биылғы жылы бесінші рет біздің оқу орнының қабырғасында өтіп отырған V Еуразиялық көлік қауіпсіздігі және цифрландыру форумының «Теміржол саласын цифрлық трансформациялау» панельдік сессиясы аясында B2B, B2G кездесулері ұйымдастырылды. Бұл алаң панельдік сессияға қатысушылар үшін – өндірістік те, ғылыми-білім беру саласының өкілдері үшін де пайдалы әрі жемісті болды, – деп атап өтті панельдік сессияның бірлескен модераторы, М.Тынышпаев атындағы ALT Университетінің доценті,техника ғылымдарының кандидаты Гүлфариза Сүлейменова.