Жұмыс әлі де жалғасады

Новости

27.10.2017, 10:07

Бүгінгі күнге дейін ұлттық компания тарапынан қолға алынған «Мөлдір бұлақ» бағдарламасы бойынша жұмыс тоқтаған жоқ. Тоқтаған былай тұрсын, алдағы 2018-2020 жылдар аралығында бұл бағдарлама жалғасады деген болжам бар. Бағдарламаның орындалуын жүзеге асырған мекеменің бірі – «Теміржолсу-Шу» ЖШС қызметкерлерінің алдағы атқарар жұмысы да ауқымды. Мекеме басшылығына келгеніне бір жыл уақыт болған Бауыржан Көкірекбаев әлі де бағдарлама аясында атқарылар жұмыстар барлығын жеткізіп, кезек күтіп тұрған объектілер тізімін түзіпті. Өткен жылы ғана Шоқпар станциясындағы су қысымды мұнарасын қалпына келтіріп, осындағы құрылғыларды жаңартып, падалануға берілгені аян. Ол мұнара 1937 жылдан бері теміржолшыларға қызмет жасап келе жатқан тарихи нысан саналады. Сондай-ақ Тасөткел, Құмөзек, Қорағаты, Қордай сынды станцияларда шағын су мұнаралары аумағын қоршау шаралары жүзеге асқан. Ол жұмыстың барлығы тұтынушылар құқығын қорғау (СЭС) мекемесінің жаңа талаптары бойынша орындалған. Ал бүгінде мекемеде 176 адам еңбек етеді. – Алдағы жылы аманшылық болса 31 станцияда осындай жұмыстар қолға алынады. Сонымен қатар біз алдағы жылы қолға алынатын жаңа бағдарламаға орай өзіміздің жобаларымызды ұсынып отырмыз. Өзіңіз байқағандай әкімшілік ғимарат та жөндеуден өтті. Барлығы өзіміздің шаруашылық есебінен жүргізілді. Аспара, Жұма станцияларының қоршауы да жақын күндері қолға алынады. Жалпы, қызмет көрсететін аумақтағы су құбырының ұзындығы 207, 8 км. Мысалы Жиделіден Мойынтыға дейін 41 құдық бар. Бұл аралықта су тасымалмен тасылады. Күзгі комиссиялық байқаудан жақсы деген бағамен шықтық. Оның арғы жағында қысқа дайындығымыз да пысықталды. Өткен жылдан сегіз тонна көмір үнемделіп қалған болатын. Жұмысшылар арнайы киіммен толық қамтылды. Жуалы ауданында орналасқан Ақтаутас станциясындағы су құбыры 2014 жылы жергілікті әкімдікке ауысып кеткен екен, енді соны өзімізге қайтарып жатырмыз. Жергілікті әкімдікке қараған шағында су уақытымен беріліп келген екен. Енді өзімізге ауысқандықтан судың тұрғындарға тұрақты түрде берілуі қадағаланып отыр. Мекемеде он екі техника бар. Олардың барлығы жұмыс жасап тұр. Өңірдегі екі ірі станция Жамбыл және Шу. Жамбыл станциясында үлкен әкімшілік ғимарат болатын. Дегенмен, оны ұстап тұру, жылуы мен суға, өзге де комуналдық қызметтерге ақы төлеу ауыр болғандықтан ол ғимарат өзге мекеменің балансына өтіп кетті. Жылудың өзіне ай сайын екі миллион теңгеге жуық қаржы кетеді екен. Сондықтан, қаржы көздерін үнемдеуде осындай шешім қабылдадық. Сондай-ақ, қосыша қаржы табу мақсатында Шу локомотив пайдалану депосына көгілдір отын қазандықтарын орнату жұмыстарын бастап отырмыз. Ол жұмыстар 77 миллион теңгеге атқарылып, келесі жылға өтеді. Жалпы, біздің жылдық бюджет 50 миллион теңге. Сондықтан, жеке серіктестік болғандықтан қосымша қаржы көздерін тауып отырмыз, – дейді «Теміржолсу-Шу» ЖШС директоры Бауыржан Көкірекбаев.

Жұмыс әлі де жалғасады

Читайте также

Газета «Қазақстан теміржолшысы», №61 от 26 июля 2024 года