Жылжымалы құрам жеткілікті

Новости

31.10.2017, 17:13

Өткен жұма ҚР Энергетика министрлігінде мүдделі мемлекеттік органдар, көмір өндіруші кәсіпорындар, тауар биржалары, трецдерлер және «Қазақстан темір жолы» ҰК» АҚ өкілдерінің қатысуымен еліміздегі көмірмен қамту мәселесіне қатысты мәжіліс өтті. Мәжілісте коммуналдық-тұрмыстық кәсіпорындарды және халықты көмірмен қамтамасыз ету, көмір жөнелтудің проблемалары тағы басқа мәселелері талқыланды. Сала электр энергиясының өндірілуінің шамамен 70%-ын, кокс химиялық өндіріс жүктемесінің жүз пайыз дерлік қамтамасыз етеді, республиканың коммуналдық-тұрмыстық секторын және халықты отынға деген тұтынушылығын толық қанағаттандырады. Оперативтік мәліметтер бойынша биыл 26 қазандағы жағдай бойынша 82 млн. тонна көмір өндірілді, бұл өткен жылдың тиісті кезеңімен салыстырғанда 10,2 пайызға көп. Ішкі нарыққа 59,8 млн. тонна көмір, оның ішінде 44,8 млн. тонна энергия өндіруші кәсіпорындарға жөнелтілді. Экспорт 22,9 млн. тоннаны құрады, бұл 2016 жылдың тиісті кезеңімен салыстырғанда 13,9% көп. Коммуналдық-тұрмыстық қажеттілікке және халыққа көмір жөнелту 9 млн. тоннаны құрады, бұл өткен жылдың тиісті кезеңімен салыстырғанда 12,5 пайызға көп. Жиынға төрағалық еткен Энергетика министрінің орынбасары Бахытжан Жақсалиев ел үкіметі тарапынан бұған соңғы кезде ерекше мән беріліп отырғанын айтты.Басқосуда отандық көмір өндірушілер ішкі нарыққа көмір өндіру және жеткізу көлемі артқанын мәлімдеді. ТЭЦ-тер үшін қатты тұрмыстық отын жетіспеушілігін жою ұлттық темір жол тасымалдаушының, жүк жөнелтушілердің және жергілікті атқарушы органның дер кезінде ойластырылған жұмыстары арқылы мүмкін болғандығы аталды. – Биыл біз жазғы мезгілдегі көмір жеткізілімін айтарлықтай арттырдық. Екінші және үшінші тоқсанда өткен жылға қарағанда қосымша тағы 4 млн. тонна жеткізілді, бұл өз кезегінде тұтынушылар қоймаларында қор жинауға мүмкіндік берді, – деді «Богатырь комир» ЖШС-нің көмір өндіру және нарыққа шығару бойынша директорының орынбасары Болат Бейсембин. Және ол министр орынбасарының вагон жетіспеушілігі бойынша сұрағына, қазірде ондай мәселе жоқ екенін жеткізді. Ал «Шұбаркөл көмір» АҚ президенті Кемаль Усманов көмір өндіру 20 пайызға артқанын айтты. Коммуналдық тұрмыстық қажеттіліктерге арналған көмірге келсек, 2016 жылға қарағанда өсім байқалады. Сол сияқты «Қаражыра» АҚ өкілі Әсет Сыдықов кәсіпорынның былтырғы және биылғы 9 айдағы көрсеткіштері туралы баяндады. Көмір өндіруші және жеткізуші кәсіпорындардан соң сөз алған Инвестициялар және даму министрлігі көлік комитетінің темір жол көлігі басқармасының бас сарапшысы Нұрбек Қабижан министрлікте «Қазақстан темір жолы» компаниясымен бірлесе жасалып жатқан жұмыстарға тоқталды. Оның айтуынша, былтыр 1 мамырдан бастап 31 тамызға дейін 17,3 млн тонна, биыл осы сәйкес кезең аралығында 20,6 млн тонна көмір тасымалданған, бұл былтырдан 19 пайызға артық. Және биыл жетіспеушілік болмау үшін ашық вагондар алуға көп күш жұмсалуда. «Биыл мемлекеттік қолдаумен 1300 дана ашық вагон алуға келісім-шарттарға қол қойылды. Ол вагондарды 2018 жылдың соңы мен 2019 жылдың басында пайдалануға беру жоспарланып отыр», - деп нақтылады ол. Тағы бір айта кетерлігі, коммуналдық тұрмыстық бағыттағы көмірмен қамтамасыз етуге арналған жұмыстар біркелкі жүруде. Бұл жағынан ешқандай мәселе туындамаған. Жоспардың орындалмауы тек жүк жөнелтушілер тарапынан болатын іс әрекеттер салдарынан, мәселен, өз өтінімдерінен бас тарту немесе жекеменшік жылжымалы құрамның келмеуінен орын алған. Тасымалдаушы – теміржолшылар тарапынан жоспардың орындалуы 98 пайызды құрап отыр. Бұл өткен жылмен салыстырғанда өте жақсы көрсеткіш. «ҚТЖ-Жүк тасымалы» АҚ президенті Оралхан Кулаков «Темір жол көлігімен көмір тасымалдау» туралы баяндамасында көмір тасымалына вагондар жетіспеушілігі мәселесін шешу үшін жылжымалы құрам паркін, соның ішінде жеке операторлар көлемін арттыру қажеттігіне тоқталды. – Көмір тасымалына қатысты жұмыстар жоспарға сай жүргізілуде. Жылжымалы құрам жеткілікті. Темір жол жылжымалы құраммен қамтамасыз ете алмай отыр деуге болмайды, біз көмір жөнелтушілермен бірге үлкен жұмыс атқардық. Барлық коммуналдық қажеттіліктер бүгінде өтелді және осы режим жыл соңына дейін сақталады. Әрине, экспорттық тасымалға қатысты аз ғана мәселе бар. Отандық зауыттар арқылы өз паркімізді жабдықтау жағына көп көңіл бөлу керек. Олардан тек «Қазтеміртранс» АҚ ғана емес, бүгін қатысып отырған жеке кәсіпорындар да вагондар ала алатындай болу керек. Күні кеше осы жиынға қатысушылармен өткен жиында мәселені оңтайлы шешу үшін «Қазтеміртранстың» барлық паркін қалай дұрыс бөлу туралы сөйлестік. Біздің компания басшылығы мен министрлік көмір өндірушілерді қолдау үшін жоспар жасақтады. Мұндағы мақсат баға саясаты ресейлік операторлар секілді жоғарылап кетуіне жол бермеу. Бағаны тұрақтандыру бойынша жұмыстар жасалуда, – деді ол.

Жылжымалы құрам жеткілікті

Читайте также

Газета Қазақстан теміржолшысы, №88-89 от 24 октября 2025 года