Басты көрсеткіш – қозғалыс қауіпсіздігі

Новости

22.05.2018, 13:34

Кез келген бөлімшенің табысы станциялар жұмысына байланысты. Жүк тасымалы жоспарын мүлтіксіз орындауға мүмкіндік беретіндей технологиялық үдеріс пен қозғалыс кестесін қатаң сақтап, өз жұмысын тиісті кәсіпорындармен үйлесімді де тиімді етіп құра білген станция үшін алынбайтын қамал жоқ. Үштөбе станциясын екі жылдан бері басқаратын Ермек Қосшығұлов бір кездері еңбек жолын дәл осы станцияда вагондар қозғалысын реттеуші болып бастаған еді. Сосын станция кезекшісі болды. Пойыз диспетчері, Талдықорған торабы бастығының орынбасары сынды жауапты қызметтерде шыңдалып, қозғалыс саласынының барлық сатысынан өтті. Әр дүйсенбі станция бастығы Қосшығұловтың кабинетіне осы бекеттегі барлық теміржол мекемелері мен кәсіпорындарының өкілдері жиналып, жолшылар жұмысы, еңбек қорғау, сенбілік өткізу, тұрғындармен кездесу, т.т. ағымдағы мәселелерді шешеді. Бірінші класты Үштөбе станциясында локомотив және локомотив бригадаларының ауысуымен жүк және жолаушы пойыздарын қабылдап-жөнелту, жүк пойыздарын тарату-құрастыру және тасымалдау құжаттарын рәсімдеудің барлық түрі, сонымен қатар жолаушы тасымалына қатысты барлық операциялар жүзеге асырылады. Жүк багажы мен пошта рәсімдеу, құрастыру жоспарына сәйкес жолаушы вагондарын ағыту мен тіркеу сынды жұмыстар толық атқарылады. Осындай үздіксіз технологиялық үдеріспен байланысты жұмыс істейтін станциялықтар қозғалыс қауіпсіздігін көздің қарашығындай сақтауды әсте естен шығарған емес. Станцияда 25 кірме жол бар. Олардың бәрі жұмыс істеп тұрған өндірістік мекемелерге қызмет көрсетеді. Сондықтан станция басшылығы кірме жолдар иелерімен өзара іскерлік тиімді қарым-қатынас орнатқан. Ағымдағы жылдың бірінші тоқсанында барлық өндірістік көрсеткіштер түгел орындалған. Орташа есеппен тәулігіне 20 жұп пойызы айналымына қызмет көрсеткен. Жүк тиеу – 312 вагонды, ал жүк түсіру 509 вагонды құраған. Үштөбе станциясы үшін негізгі жүк жөнелтуші кварц өндіретін «МК Казсиликон» ЖШС болып табылады, ай сайын орташа есеппен 70 вагон өнім тиейді. Одан басқа станцияға күн сайын келетін түрлі жүктер, соның ішінде құрылыс материалдары, түрлі сұйықтық және көмір отыны, т.т. тиеген вагондар үздіксіз келіп, жанама жолдарда түсіріліп жатады. – Әрине, ең алдымен станцияның басшылық құрамы негізгі жауапкершілікті өзіне жүктейді, дегенмен біздің ұжымда бәрін басшыға артып отыру деген атымен жоқ, пойыз құрастырушыдан станция кезекшісі, тауар кассирі... қысқасы әрбір қызметкер кез келген жауапкершілікті мойнына алуға дайын, – дейді Ермек Амангелдіұлы. Айта кету керек, соңғы 7 жылдан бері станция жұмысшылары пойыздар қозғалысы қауіпсіздігінің бұзылуына жол бермеген. Бұл – станция ұжымының басты көрсеткіші.

Басты көрсеткіш – қозғалыс қауіпсіздігі

Читайте также

Газета «Қазақстан теміржолшысы», №101 от 29 ноября 2024 года