Машинистердің «өз үйі – өлең төсегі»

Новости

31.08.2016, 16:14

Жуырда Маңғыстау локомотив пайдалану депосының жанынан локомотив бригадаларының демалыс үйі пайдалануға берілді. Мұнда машинистер мен олардың көмекшілеріне кезекті рейстен кейін жайлы орында демалып, тынығуына жағдай жасалған. Он жатын орны мен жуынып-тамақтанатын, киім ауыстыратын, демалатын бөлмелері бар шағын демалыс үйі аймақтағы локомотив бригадаларының қажетін толық өтейді. Қай жерде сапарда жүрсін, локомотив бригадаларының кезекті ауысым алдындағы демалысын ұйымдастыру теміржолшылар үшін ежелден бұлжымас заңдылық, басты шарт. Бертінге дейін локомотив бригадалары Маңғыстау елді мекенінде №26 жатақхананың жалдамалы екі бөлмесінде орын теуіп келді. Алайда, жатын орынның талапқа сай келмеуі, жаз мезгілдерінде ыстық, қыс айларында салқын болатындығы, сондай-ақ, сумен қамту қызметінің көңіл көншітпейтіндігі осыған дейін талай рет көтерілген мәселе болатын. Міне, «Локомотив сервистік орталығы» АҚ филиалы «Локомотив» АҚ құрамына қосылғаннан кейін ғимарат күрделі жөндеуден өтіп, машинистер үшін барлық мүмкіндіктер қарастырылған демалыс үйіне айналып отыр. ─ Локомотив бригадалары – біздің негізгі күшіміз, сондықтан оларға жағдай жасау бірінші кезекте. Біздегі Бейнеу, Маңғыстау, Жаңаөзен, Шетпе, Сайөтесті қосқандағы локомотив деполарына қарасты штат саны 760 адамды құрайды. 530 локомотив бригадасы бар, оның ішінде 260 машинистер және 270 машинист көмекшілері. Демалыс орнында қарастырылған 10 орын әзірге Жаңаөзен, Бейнеу бағытынан келетін локомотив бригадаларына толықтай жетіп тұр. Біздің басты мақсатымыз – сол локомотив бригадаларының талапқа сай тынығып-демалуына жағдай жасау. Жақсы демалған бригада жолда қырағы отырады, жұмысқа қабілеті өседі, жұмыстың өнімділігіне едәуір септігін тигізеді, ең бастысы қозғалыс қауіпсіздігі толық сақталады, – дейді Маңғыстау локомотив пайдалану депосының кәсіподақ комитетінің төрағасы Әбілсейіт Нәбиханов. Оның айтуынша, болашақта Бейнеу, Сайөтес станцияларында да машинистердің демалыс үйлерін жетілдіріп, оған спорттық бөлмелерді де қосу жоспарланып отыр екен.

Машинистердің «өз үйі – өлең төсегі»

Читайте также

Газета Қазақстан теміржолшысы, №37 от 15 мая 2026 года