Дөңес қызметі жетілдірілуде

Новости

24.01.2017, 12:36

3 мин чтения

Семей станциясы Шығыс өңіріндегі ең ірі тораптық әрі түйіспелі станция саналады. Қазіргі күні аталмыш станциядағы техникалық үдерістерге тың жаңашылдықтар енгізілуде. Оның ішінде станция басындағы автоматтандырылған сұрыптау дөңесінің жұмысы бірінші кезекте назарға алынып, жүйелендіріліп жатыр. Қазіргі уақытта станциядағы дөңес басында қызу еңбек қарқын алуда. Жыл басындағы көрсеткіш жоғары. Атап айтсақ, осыған дейін бір ғана сұрыптау мезетінде жеті вагон өңделген болса, дәл бүгінгі күні, жаңа техникалық процестер нәтижесінде оның көлемі 800 тонна болатын 20 вагонға дейін арттыруға мүмкіндігіне қол жеткізіліпті. -Өңделетін вагондар санының бұлайша күрт артуына өткен жылдың күз айында станция басындағы өндіріске енгізілген жаңа техникалық процестің оң нәтижесі ықпал етіп отыр, - дейді станция бастығы Ғабит Есқожанов. Яғни, байырғы тех. үдеріс ауыстырылысымен дөңестегі жұмыс та ширап сала берген. Ал тиімділігі сол, осы жаңашылдықтың есебінен, бүгінгі таңда тәулігіне 1 мың 789 вагон өңделеді. Салыстырмалы түрде айтар болсақ, өткен жылдың есепті мерзімінде 1 479 вагон ғана сұрыпталатын еді. Яғни, бүгінде жетістік көлемі еселеп, 300 вагонға дейін артып отыр. Өндіріске енгізілген жаңашылдықтар нәтижесінде сұрыптау дөңесіндегі жұмыс барысы әлдеқайда ширатылды. Мәселен, қазір небары 15 минуттың ішінде 57 вагонды әзірлеуге болады. Бұл дегеніміз қас-қағым сәтте бір жылжымалы құрам жасақталады деген сөз. Ал жалпылама айтатын болсақ, қазіргі уақытта тәулігіне 15 пойызды жасақтап, сапарға аттандыруға толық мүмкіндік бар. Рас, әлі де тыңғылықты жұмыс жүргізіп, тиімділікті еселеу қажеттілігі байқалады. Мысалы айтсақ, алдағы уақыттарда сұрыптау ісін бір ғана маневрлік жұмыспен жүргізу ісі көзделуде. Өйткені, қазіргі таңда вагондар салмағы 2,500 тоннадан асса қос маневрлік айналым жасалады. Яғни, локомотив өнімділігін арттыру керек. Ал осы тарапта алдағы уақытта дөңесті қайта жаңғыртудан өткізу ісі жоспарда тұр. Дегенмен, бұл жайт тағы да қаражат мәселесіне келіп тіреледі екен. Бүгінде үдеріске жаңадан енгізілген техникалық процес талабы бойынша сұрыптау дөңесі ай сайын арнайы комиссияның қарауынан өтіп, №561 бұйрық негізінде тексеріледі. Бұл орайда айта кетерлігі, дөңес басында жұмыс істейтін теміржолшылар біліктілігін арттырудың маңыздылығы зор. -Қазіргі күні Семей станциясы бойынша 31 пойыз құрастырушы өнімді еңбек етуде. Араларында еңбек өтілі көп, тәжірибелі мамандар болғанымен жастардың үлесі мол. Сол себепті, кәсіби тұрғыдан шыңдалуға, біліктілікке баса мән беріледі, - дейді Семей станциясының бастығы Ғабит Ғазизұлы. Бүгінгі күндері дөңес басында әзірше 6 локомотив жұмыс жасауда. Алайда, пойыз санының көбейіп, жүк тасымалының артуына байланысты өңделетін вагондар еселейтін болса, олардың қатарын ең кемі 8 локомотивке жеткізу көзделуде.

Дөңес қызметі жетілдірілуде

Читайте также

Сейчас читают