Тәжірибе алмасу дәрісі

Новости

14.02.2017, 12:15

2 мин чтения

Машинистер мен вагон қараушылар – темір жол көлігі саласында пойыздар қозғалысына ең жауапты мамандар болып саналады. Сондықтан оларға қойылатын талап та жоғары. Маңғыстау жүк тасымалдау бөлімшесінде локомотив пайдалану депосы мен вагон пайдалану депосы бірлесе әр аптаның екінші және үшінші күндері машинистер мен вагон қараушыларға техникалық сабақ жүргізуді жолға қойған. Жұмыс сапасын арттыру мақсатын көздейтін тәжірибе ауысу дәрісі сейсенбі күні локоматив депосында, сәрсенбіде вагон пайдалану депосында өтеді. Машинистер мен вагон қараушылардың бұл жолғы басқосуына жүк вагондарының тіркегіші және оның қалай жұмыс жасауы мен ақаулықтары арқау болды. Онда жуырда Ақтау портында кездескен және бұдан бірнеше жыл бұрын Маңғыстау станциясынан Болашақ станциясына жол алған вагон тіркегішіне байланысты орын алған жайттар да сөз болды. –Тепловоздың бірінші вагонмен дұрыс жалғануына машистер, ал өзге вагондар тіркегіштерінің ақаулығына вагон қараушылар жауап береді. Сондықтан тіркегіш мәселесінде олардың білуге тиісті тұстары өте көп,- деп техникалық оқуды бастаған Маңғыстау вагон пайдалану депосының техникалық қызмет көрсету бөлімінің бастығы Жұмабек Якупбаев сабақ барысында машинистерден түскен сұрақтарға жауап берді. Мысалы, машинист А.Сүйіновтің «бұрынғы және қазіргі техникалық үдеріс бойынша жолаушылар мен жүк пойыздары қанша минутта қозғалып кетуі керек, алдыңғы техүдеріске қарағанда қазіргісінде уақыты неге қысқа», деген сауалы бойынша уақыт ерекшеліктерінің себебін асықпай түсіндірді. –Бұрын кейбір мәселелер туындай қалса машинистке техникалық ескертулер түсетін. Қазір өзіміз бетпе-бет сөйлесіп, ескерту неден болды, соның салдарын іздейміз. Жағдайдың орын алуына негіз болған себептерді талқылап, түсіндіреміз. Жұмыс өз жемісін беріп те жатыр. Сабақ алдын ала бекітілген жоспарға сәйкес айына 3 рет вагон депосында, 3 рет локоматив депосында өтеді. Тек теориялық қана емес, практикалық түрінде де жүргіземіз. Тақырыпты ашуға өз білгендерімізден бөлек, ғаламтор материалдарын, бейнероликтерді, сондай-ақ оқу залындағы көрнекіліктерді қолданамыз. Қалғанын ағыту тұйығынан көрсетеміз,- дейді дәрісті жүргізуші Жұмабек Якупбаев.

Тәжірибе алмасу дәрісі

Читайте также

Сейчас читают