Әйел – ару, әйел – жар, әйел – ана...

Новости

07.03.2017, 13:54

2 мин чтения

Көңілге көктемнің шуағын сыйлап, жанды жадыратар 8 наурыз – Халықаралық әйелдер күніне арналған мерекелік кешті «Жолаушылар тасымалы» акционерлік қоғамының президенті Нұрдәулет Қилыбай бастаған азаматтар өз ұжымындағы қыз-келіншектерге арнап ұйымдастырды. Теміржолшылардың әкімшілік ғимаратының мәжіліс залына кіреберісте нәзік жандыларды гүлмен қарсы алған ер азаматтар бұл күні жүздері бал-бұл жанып, сәніне сән қосып, ажарлана түскен аруларға бар ықылас-тілектерін жаудырауда. Бірінші болып сахна төріне көтерілген «ҚТЖ» ҰК» АҚ вице-президенті Эрик Имашев темір жол саласында 35 мыңнан астам әйел адам еңбек етіп жатса, соның басым бөлігі жолаушылар тасымалы шаруашылығында екенін атап өтті. Зал толы әйел қауымына ақжарма тілегін жеткізіп, отбасыларына амандық, дендеріне саулық, еңбектеріне жеміс тілеген Эрик Еркінұлы «ҚТЖ» ҰК» АҚ жетекшісі Қанат Алпысбаевтың ізгі тілектерге толы Құттықтау хатын Нұрдәулет Игілікұлына табыстады. Бұдан кейін сөз кезегін «Жолаушылар тасымалы» АҚ басшысы алды.Ықылым заманнан аналарын ардақтаған, қарындасын құрметтеген, қыздарын қадірлеген халықтың ұлымыз. Біздің ұлттық намысымыз да қыз намысын қорғаудан басталады. Аналарымызға, аруларымызға арналған жыр, ән мен күй, дастан да көп. Өкінішке қарай, біз ер азаматтар бізбен иық тіресіп, тізе қосып жұмыс істеп жатқан жандар өз ісінің кәсіби шебері, мықты теміржолшы ғана емес, жаны нәзік, жүрегі жұмсақ ару, пейілі кең қамқор ана екенін көп жағдайда естен шығарып аламыз. Шын мәнінде, әйел адамға көп нәрсе керек емес, ілтипат, жан жадыратар жылы сөз және адалдық. Әйелдер ғана шынайы сүйе алады, шынайы күте алады, шынайы жылай да алады және шынайы бағалайды. Сіздер сол қасиеттеріңізбен мықтысыздар. Тарихтан білеміз, соғыс жылдарында әйелдер бейбіт майданда Жеңісті жақындатуға күресті, олардың қатарында паровоз машинисі де, жолшы, вагоншы, болды, қысқасы теміржолдағы барлық жұмысты әйелдер атқарды. Құдайға шүкір, қазір «қой үстіне бозторғай жұмыртқалаған заман». Теміржолшы әйелдердің де жұмысы жеңілдетілді. Соның өзінде сіздер біздің үйде де, түзде де тірегіміз болып қаласыздар. Сіздерге мың алғыс, мың тағзым. Бастарыңыз аман, дендерің сау, көңілдеріңіз көтеріңкі, өмірлеріңіз сәнді болсын! – деп жүрекжарды лебізін білдірді Нұрдәулет Игілікұлы. Бұдан соң Қоғам басшысы «Жолаушылар тасымалы» АҚ-ның зейнеткерлеріне, еңбеккер әйелдеріне Алғыс хаттар мен ескерткіш сыйлықтар табыс етті. Өз кезегінде орталық кәсіподақ төрағасы Оразғали Ахметбаев та сахна төріне көтеріліп, темір жолда тер төгіп жүрген әйел қауымын төл мерекелерімен құттықтап, ізгі тілегін жеткізді. Мерекелік кеш соңы теміржолшылардың концерттік бағдарламасына ұласты.

Әйел – ару, әйел – жар, әйел – ана...

Читайте также

Сейчас читают