Әкесінің ізімен...

Новости

07.03.2017, 14:15

2 мин чтения

Маңғыстау жол дистанциясы директорының орынбасары Бекберген Құрбановтың төрт қыз, бір ұлы бар. Отбасының үшінші қызы Сәулемай ғана медицина саласын таңдапты. Қалған апалы-сіңлілер Қалия, Әлия, Дәмежандар теміржол саласында. Алматы қаласындағы М.Тынышпаев атындағы Қазақ көлік және коммуникациялар академиясында тәлім алған қыздардың үлкені Қалия Маңғыстау магистральдық желі бөлімшесінде диспетчер, Әлия жол дистанциясында еңбекті ұйымдастыру және нормалау инженері болса, Дәмежан теміржолда кітапханашы, ал отбасының кішісі Бекзат жол жөндеуші. Жалпы, белгілі теміржолшы Бекберген Жоламанұлын түбек халқы өте жақсы біледі. Еңбек жолын 1979 жылы Түркіменстанда, Мары жол дистанциясында жол монтері болып бастаған Бекберген Құрбанов 1986 жылы атамекенге қоныс аударған. Төрт қыздың ішінен Әлия әкесіне өте жақын, сондықтан да болар былайғы жұрт оны «әкесінің қызы» дейді. 2004-2007 жылдары КазАТК-да бухгалтерлік есеп және аудит мамандығында, сосын «Тасымалды ұйымдастыру және көлік қозғалысын басқару» мамандығында сырттай оқу бөлімін бітіріп шыққан Әлия Құрбанова бүгінде жол дистанциясында еңбекті ұйымдастыру және нормалау инженері болып еңбек етеді. – Еңбекті нормалау жөніндегі жұмыстар өндірістің едәуір тиімді жағдайларын анықтау, оларды нормалауға бекіту және осы нормаларды игеру, жұмыстарды жалпы салалық деңгей бойынша еңбек шығындарының қол жеткізілген көлемін бағалау, осы деңгейге қол жеткізу мүмкіндігін анықтау және оны төмендету, техникалық және ұйымдық сипаттағы шаралар кешенін жүргізудің нәтижесінде еңбек шығындарын азайтудың экономикалық негіздемесін тексеруді жүргізу сияқты көптеген міндеттерді шешеді. Жыл сайын қызметкерлер санының нормасын – ұйымдық-техникалық жағдайларда нақты өндіріс қызметін атқаратын және жұмыс көлемін орындауы үшін қажетті қызметкерлердің белгіленген санының есебін есептеп шығарамын. Тағы бір атқаратын қызметім – еңбек ақыны дұрыс ұйымдастыру. Бұл өндірістік мәселелермен бірдей маңызды іс. Яғни, ай сайын жұмысшылардың еңбек ақысының дұрыс төленуін қадағалап, оның да есебін шығарамын. Жалақыны ұйымдастырудың негізгі міндеті – еңбек ақыны әрбір жұмысшының еңбек үлесімен байланысты етіп, жұмысшының жұмысқа ынтасын арттыру болып табылады. Ірілендірілген Маңғыстау жол дистанциясының қызметкерлеріне тіс емдеуге, балалы болғанда, үйленгенде, балалары жазғы демалысқа барғанда, еңбек демалысы кезінде демалыс орындарына, т.т. әлеуметтік сипаттағы төлемдер төленіп отырылады, – дейді Әлия Құрбанова. Әлия тігіншілік, массаждық, бухгалтерлік, кондитерлік курстарға қатысқан. Бос уақыттарында киім тігіп, той-томалақ, туған күн кештеріне тәттілерді өз қолымен әзірлейді. Сонымен қатар, көлік жүргізудің шебері. «Бұл өмірде бәрінің қажеті болады» дейді әкесінің қызы.

Әкесінің ізімен...

Читайте также

Сейчас читают