Сұраныста – Астана-Жүк станциясы

Новости

04.04.2017, 15:35

3 мин чтения

Елімізде «ЭКСПО-2017» халықаралық көрмесінің ашылуына теміржолшылар қызу дайындық үстінде. Үстіміздегі жылдың 1 маусымында Астана жаңа вокзалы кешені ашылып, көрменің өтуіне байланысты қосымша жолаушылар пойызы жіберіледі деп күтілуде. Және де бүкіл жолаушылар пойызы Астана арқылы өтіп, жаңа вокзал кешеніне тоқтайтын болады. –Жаңа вокзал кешені Астана мен Қырқыншы станцияларының ортасында орналасқан. Жаңа вокзал кешенінің ашылуымен жұмыс көлемі ұлғаяды. Жолаушылар ағыны көбейетіндіктен, осы екі станцияның өткізу қабілеті күрделене түсері анық. Сол себептен біз бүкіл жолаушылар пойызын күндіз, ал жүк пойыздарын түнгі мезгілде өткізуді жоспарлап отырмыз. Десек те, жүк пойыздарының кідірісінен қашып құтыла алмаймыз. Вагондардың тұрып қалуы, айналымның бәсеңсуі дегендей. Біз мейлінше пойыздар кідірісін, вагондардың тұрып қалмауын болдырмауға күш салып, кірме жолдарға құрамдардың кіріп шығуына бар жағдайды жасауға тырысамыз, – деген Астана станциясының директоры Әділет Айтбек бұл күрделі мәселенің бір ғана шешімі бар екенін жеткізді. Ол Астана станциясы торабын дамыту. Яғни, жүк нөпірі көп келетін және тиелетін индустриалдық парк 2, ЖТХ аумақтарында жаңа Астана-Жүк станциясын салу. Бұл станция сол аудандағы жүк жөнелтушілер мен жүк қабылдаушылардың қажеттілігін өтеу үшін салынбақ. Астана станциясы басшының айтуынша, бұл станцияның қажеттілігі бар ма, ол қаншалықты тиімді деген сұрақтар бойынша талдау жасалған екен. Талдау нәтижесі, жүк тиеп жөнелтушілер мен қабылдаушылардың 80 пайызы қаланың сол бөлігінде, яғни, индустриалдық парк 1, 2, солтүстік, таяу және шалғай солтүстік деп аталатын аудандарда екенін айқындап беріпті. Ал Астана-Жүк станциясы қаланың аталған бөлігіндегі жұмысты ұйымдастыруға мүмкіндік беріп, бір мезетте ТЭЦ пен сол ауданда орналасқан барлық кірме жолдарға қызмет көрсететін болады. –Жүктің басым бөлігі Қырқыншы станциясы жағынан келеді. Сол себепті кірме жол қожайындарына осы станциядан келген жүкті әрмен қарай Астана-Жүк станциясына бағыттауды ұсынып отырмыз. Неліктен дейсіз ғой... бұл жүк тасымалын ұйымдастырушылар үшін де, жеке меншік иелері үшін де тиімді. Біріншіден, станциялық жолдарда құрамдардың тұрып қалу уақыты азаяды. Екіншіден, жүкті жеткізу мерзімі үшін қолайлы. Үшіншіден, вагондарды беру, жинау операцияларын күтіп тұрмайды. Барлық шаруа қаланың сол бөлігінде, Астана-Жүк станциясында Астана темір жол шаруашылығы мен біздің бірлесе жұмыс істеуіміздің арқасында жүзеге асырылып, вагондардың тұру уақытын қысқартады. Мыслы, Қарағанды немесе Павлодардан келе жатқан жүктің басым бөлігі шалғайдағы солтүстік жағына кететін болса, Астана-Жүк станциясына кіріп, сонда таратылады да, сосын барлық вагон ағыны Астанаға келіп, одан әрмен қарай біз оларды нұсқамаға сәйкес межелі жерлеріне жөнелтеміз. Осы тәсілмен тәжірибе жұмыстарын жүргізіп көрдік. Ұтымды екенін анықталды. Қызығушылық танытқан клиеттеріміз де бар, – деп сөзін түйіндеген станция директоры кірме жолдар иелерімен осы бағытта түсіндіру жұмыстары жүргізіліп жатқанын жеткізді.

Сұраныста – Астана-Жүк станциясы

Читайте также

Сейчас читают