Жаңа вокзал – сарапшылар көзімен

Новости

16.06.2017, 17:03

2 мин чтения

Транскаспийлік халықаралық көлік бағдары (ТМТМ) форумында бас қосқан делегаттардың бір тобы жуырда ашылған «Нұрлы жол» вокзалына ат басын бұрып, жаңа нысанды аралап көрді. Сарапшыларды «Нұрлы жол» вокзалы кешенінің бастығы Дінмұхамед Құсайынов қарсы алып, жаңа вокзалмен таныстырды. Аумағы 126 мың шаршы метр болатын алты қабаттан тұратын жаңа вокзалының бірінші және екінші қабатында 140 көлікке арналған автотұрақ барын айтқан вокзал бастығы, жолаушылардың тексерістен өткізетін 16 кіреберіс барын, сондай-ақ ақылды жүйемен басқарылатын 510 камера орнатылғанын тілге тиек етті. Сонымен қатар, үшінші қабатта шатыр астында орналасқан перронды көрсетіп, ғимараттың ең негізгі қабаты болып саналатын төртінші қабатты таныстырды. Басты кіреберіс пен 10 билет кассасы, анықтама бюросы бар қабатта сауда орындары да ашылғанын айтып өтті. Зәулім ғимараттың бесінші қабатындағы фуд-кортты көрген сарапшылар бір нысанның ішінде жолаушылар үшін барлық жағдай жасалғанына таңдай қағысты. Тәулігіне 35 мың жолаушыға қызмет көрсететін вокзалда ана мен бала бөлмелері, қонақ үй, медициналық пункттер мен мүмкіндігі шектеулі жандарға арналған орындарды тамашалаған сарапшылар үш тілде сөйлейтін вокзал қызметкерлеріне де риза болды. – Мен Астанаға осыдан 10 жыл бұрын келгенмін. Ол кезде қалада құрылыс жұмыстары жүріп жатқан болатын. Енді биыл екінші рет Экспоға келіп, жайнаған Астанаға қарап, өз көзіме өзім сенбедім. Бүгін мынадай ғажап вокзалды аралап, көркіне көзім тоймады. Құрылыс жұмыстары толық аяқталған кезде, тіпті керемет болайын деп тұр, – деп таңданысын жасыра алмады шетелдік сарапшы Ирина Аурелия. Ал қытайлық мейман Лю Даоцзюнь алып та еңселі ғимараттың әрбір қабатын, әр залды қайта-қайта қызықтап: «Мұндай алып вокзалды бұрын-соңды көрмеппін!», деп бір-ақ қайырды. – Қашанда жаңадан бой көтерген ғимарат қызықтырмай қоймайды. Мына біз аралаған вокзал да өте керемет салынған екен. Халықаралық көрмеге келген қонақтарға міндетті түрде осы жаңа вокзалды көруге кеңес беремін. Өйткені мұндайды тек көру керек! Теңдессіз нысан тынымсыз жұмыс жасап, ел игілігіне жарасын деген тілегімді білдіргім келеді, – деп әсерімен бөлісті литвалық сарапшы Тонтгинас Санкаустнас.

Жаңа вокзал – сарапшылар көзімен

Читайте также

Сейчас читают