Жастар қалауы – кәсібилік

Новости

04.07.2017, 09:57

2 мин чтения

Жас буын арасында кәсібилікті шыңдау – бүгінгі таңдағы өзекті мәселенің бірі. Ағымдағы жылдың наурыз айында Семей бөлімшесі бойынша осы бағытта ерекше байқау жарияланған болатын. Жас буынды техникалық білімге ынталандыра отырып, біліктілікті арттыруды көздеген байқау төрт айға созылып, Астана күні қарсаңында мәреге жетті. Аталмыш конкурсқа пойыз құрастырушылар, станция кезекшілері, машинистер мен вагон қараушылар қатысқан болатын. Қорытынды жиында осы мамандық иелерінен құралған командалар, атап айтсақ, бөлімшеге қарасты Семей, Жаңасемей, Дегелең, Шар, Аягөз сынды ең ірі бес станцияның жас теміржолшылары өзара іріктеліп, ақтық сайысқа түсті. Алғашқы кезең бойынша әр команда алдын ала әзірленген сауалдарға жауап берді. Қызметтік бағыт бойынша қойылған сұрақтардың жауабын табу оңайға түспеді. Кейбір жауаптар қазылар алқасын қанағаттандырмағандықтан қабылданбай жатты. Әйтсе де, командалар арасынан теміржол саласы бойынша эрудициялық білім қоры мол жігіттер мен қыздардың көп екендігі осы кезеңдерде анық байқалды. Сайыс жайдарман ойындары тәртібімен өткендіктен де жастар үшін мейлінше қызықты әрі тартымды өрбіді. Әрбір кезең арасында байқаудың басқа да аталымдары яғни, «Үздік техникалық дәрісхана», «Үздік бейнефильм» бойынша жүлдегер атанған бейнероликтер көрерменге көрсетіліп отырды. Бұл материалдар арнайы құрылған комиссияның қарауынан өтіп, ұзақ талқыланған соң ғана жеңімпаздар анықталыпты. Нәтижесінде «Үздік техникалық дәрісхана» аталымын арнайы жабдықталған кабинеті барлық талапқа сай келетін Жаңасемей станциясы жеңіп алыпты. Ал, «Үздік бейнефильм» аталымын тепловоз бригадасының қарбаласқа толы бір күндік қызметін санаулы минуттан тұратын кадрларға әсерлі түрде сыйдырған, шығармашылық тұрғыдан айрықша тапқырлық танытқан Аягөз локомотив пайдалану депосының теміржолшылары иеленді. «Менің сүйікті мамандығым» атты әуесқой бейнефильмді машинистердің өздері әзірлепті. Жалпы байқауды ұйымдастыру арқылы жастардың біліктілігін шыңдау, ұжымдық әрекеттестікті дамыту, мамандардың өз қызметтеріне құштарлығын арттыру көзделген болатын. Бұл туралы байқау қорытындысын жариялауға сахна төріне шыққан бөлімшенің өндірістік-техникалық бөлімінің басшысы Гүлнар Төлеуханова айтып өтті. Ал, бөлімшенің бас инженері Отарбек Кемелбекұлы осынау шараның өту барысына тоқтала келе, жастардың кәсібилікке деген ынтасына қазылар алқасының көңілі толатынын жеткізді. Нәтижесінде барлық кезеңнен сүрінбей өткен аягөздік жастардан құралған «Аягөз» командасы жеңімпаз атанып, бірінші орынды жеңіп алды. Осыған дейін жайдарман ойындары бойынша төрт бірдей бөлімше арасындағы ойындардың жүлдегері атанған аягөздіктер бұл жолы да жасындай жарқылдады. Ал, жүлделі екінші орынды Жаңасемей теміржолшыларының «Экспресс» командасы иеленсе, үшінші орын Дегелең жастарының еншісіне тиді. Сонымен қатар әр аталым бойынша да байқау жеңімпаздары анықталып, барлығы Астана бедерлі мақтау грамотасымен және қаржылай сыйақымен марапатталды.

Жастар қалауы – кәсібилік

Читайте также

Сейчас читают