Атбасар станциясы: жүк керуендері толастамайды

Новости

24.12.2017, 16:12

Атбасар станциясының атауы зерттеулер бойынша «Ат базар», «Ат басар» деген атаудан шыққан делінеді. Тарихы сонау 19 ғасырдың ортасынан бастау алатын станция кезінде шекаралық қосын ретінде бой көтерген, халық шоғыры мол, сауда жолы болған. Атбасар – бүгінде халықаралық бағдарларға жол бастайтын күре жолдың бойындағы теміржол станциясы. Кезінде ат базары болған станциядан аттанған жүк вагондарының керуендер легі әлі толастаған емес. Атбасар станциясы бастығының орынбасары Бекжан Сарғасқаевтың айтуынша, бүгінде Қытайға астық жіберумен ел назарын өзіне аударып отырған станцияда осы жылы жолаушы тасымалы да артқан, әсіресе ЭКСПО-2017 кезінде де жолаушылар вагондарының айналымы екі есе артқан. –Халықаралық көрме өткен кезде 4 Тальго пойызы қосылып, бізден әдетте өтетін 24 жолаушы пойызының қатары өсті. Тәулігіне 4500-дей жүк вагоны айналымда. Станцияда 18 жол бар, оның бесеуі – сұрыптау жолы. Жалпы станцияда жүзге жуық адам еңбек етеді, соның ішінде 13 пойыз құрастырушылар, 5 – станция кезекшілері, 4 - олардың көмекшілері. Ақмола ЖТ бөлімшесіне қарасты станция техникалық жоспарды мүлтіксіз орындап, қауіпсіз қозғалысты қамтамасыз етіп отыр, - дейді Б. Сарғасқаев. Бүгінде 25 мыңнан астам халық тұратын Атбасардың тұрғындарының 2500-дейі теміржолшы екен. Мұнда осынша халықты жұмыспен қамтып отырған теміржолдың барлық құрылымдық бөлімшелері бар. Сонымен қатар локомотив, вагон жөндеу зауыттары жұмыс істейді. Айына 1500 вагон тиелетін станциядан негізінен астық, метал жүктері жөнелтілсе, түсірілетін жүктер түрлері - тыңайтқыштар, көмір, отын, жанармай екен. Дәл қазіргі таңда станцияда жолдың 6 км жерін адам өтпестей биік етіп қоршау жұмыстары жүргізіліп жатыр. –Қауіпсіздік талаптары қатаң сақталады. Қоршау сол бөгде адамдардың жолды кесіп өтпеуі үшін жасалуда. Өйткені, бізде қазір астық тиеу, басқа да жүктер түсіру-тиеу көбейіп, вагон құрастыру жұмыстары жиіледі. Ондай қоршауларда тек теміржолшылар үшін арнайы есіктер болады. Ал халық арнайы көпірмен өтуі керек, - дейді станция бастығынынң орынбасары. –Айына 4 рет техникалық сабақ өткізіледі. Қауіпсіздік – бірінші кезекте. Ал астықтың Атбасардан жиі жіберілуі - біріншіден жүк жөнелтушілер талабына байланысты болып отыр. Әрі бұған қоса вагондарды тиеп, құрастыруда Атбасар станциясының жолы оңтайлы, ыңғайлы көрінеді,- дейді ол.

Атбасар станциясы: жүк керуендері толастамайды

Читайте также