Ұжымдық шарт талқылануда

Новости

23.01.2018, 13:04

Ағымдағы жылдың 1 қаңтарынан бастап ұлттық компания бойынша күшіне енген ұжымдық шарт мазмұнын семейлік теміржолшылар арасында да кеңінен түсіндіру жұмыстары басталып кетті. Өткен апта соңында бөлімше басшылығы салалық кәсіподақ комитетінің өкілдерімен бірге желі бойына шығып, шалғайдағы жол айрықтары да ақпараттандырылып, ұжымдық шарт қызу талқылануда. Мұндай басқосулар алғашқы кезекте Аягөз, Жарма, Жаңғызтөбе, Суықбұлақ, Шар, Дегелең, Жаңасемей сынды бірқатар ірі станцияларда ұйымдастырылды. Сондай-ақ, Локоть-Семей бағытындағы Ауыл, Белағаш, №41 разъезд, Дүйсекен тәрізді шағын станциялар да тыс қалмады. Ақпараттандыру жұмыстарын жүргізу үшін Семей ЖТ бөлімшесі және Семей магистральдық желі басшыларынан тұратын мобильді үш топ құрылған болатын. Бұл бағыттағы шараларға бөлімше басшысы Марлен Кәрімұлы тікелей жетекшілік етіп, назарда ұстап отыр. Теміржолшылардың кәсіби және әлеуметтік өміріне қатысты маңызды тақырып болғандықтан, жиындарға қатысушылар саны мол болды. Сәйкесінше, қарапайым еңбеккерлер тарапынан сауалдар да көп қойылған. Әсіресе, жалақы мөлшерінің өсуі, зейнеткерлік жас, нормалық жұмыс сағаты төңірегінде қызу әңгіме өрбіді. Семей ЖТ бөлімшесінің кәсіподақ ұйымы төрағасы Асхат Жармұхамбетовтың айтуынша, 2018-2020 жылдарға арналған аталмыш құжаттың бұрынғысына қарағанда біршама айырмашылығы бар. Бірінші кезекте, бұл жолғы ұжымдық шартта еңбек құқығын қорғау, еңбекті қорғау, еңбеккерлер мен олардың балаларының денсаулығын нығайтуға байланысты әлеуметтік кепілдіктер қатары артқан. Сондай-ақ, материалдық көмек пен жәрдемақылар көлемі өсе түскен. –Баса атап өтер жайт, алдағы үш жылға арналған жаңа құжатта кәсіподақ ұйымдарының рөлі күшейтіліп, қызметкерлердің әлеуметтік, материалдық һәм моральдық әлеуеттілігін арттыруға басымдық берілген. Сондай-ақ, жұмыс беруші тараптың міндеттерін де айқындай түседі. Сондықтан болар, желі бойында өткізілген жиындар барысында теміржолшылар ұжымдық шарт міндеттемелеріне қанағаттанатындықтарын жеткізіп, тиісті құжат талаптарының орындалуын қадағалауымызды өтінді, – дейді Асхат Қажмұхамбетұлы. Жаңа ұжымдық шарттың тағы басқа да ерекшеліктеріне тоқталсақ, теміржолшылар мен олардың балаларына көрсетілетін бір реттік материалдық көмектің айлық есептік көрсеткіші өскен. Сондай-ақ, зейнеткерлерге арналған жәрдем мен бір реттік көмек бойынша да біршама айырмашылықтар бар. Кәсіподақ басшылығының айтуынша, толықтырылып, жаңартылған құжаттың нұсқасында Семей ядролық сынақ полигоны сынды экологиялық апат аумағында туып-өскені туралы куәлігі бар немесе осы аумақта тұратын теміржолшылардың статусы да нақтыланған. Бұл ретте барлық заңнамалық, құқықтық-нормативтік актілер қағидаттары толық сақталып отыр. Қазіргі күні бөлімшенің кәсіподақ ұйымы мүшелері үш жылға белгіленген жаңа құжатты толық зерделеп, қажетті пункттердің астын сызып оқып, тіпті маңызды тарауларды жаттап та алып жатыр. Бұл орайда, еңбеккерлер мүддесі үшін құқықтық мәні бар, жиі қозғалатын бөлімдер бойынша арнайы брошюралар әзірлепті. Яғни, жаңа ұжымдық шарт бойынша толық сауаттылық талап етілуде. Ал, алдағы апталарда «Қазақстан Республикасының теміржолшылар кәсіподағы» қоғамдық бірлестігінің Семей өңірі бойынша өкілі Алик Досановтың тікелей төрағалығымен арнайы кеңес өткізіліп, жаңа ұжымдық шарт бойынша жүргізілетін жұмыстар барысы кеңінен пысықталмақ.

Ұжымдық шарт талқылануда

Читайте также