Орнында бар оңалар...

Новости

23.01.2018, 13:09

Маңғыстау вагон пайдалану депосының операторы Қызғалдақ Панабекованың тағдыры ешкімді бей-жай қалдырмайды. Осыдан он екі жыл бұрын шиеттей баламен жесір қалған уыздай жас келіншектің жолдасы Жәнібек осы депода вагон қараушы болған... – Бүгінде баларым өсті, құдайға шүкір деймін, алды тұрмыста, кішісі 13 жаста. Әкелерінің жоқ екенін білдірмей, ештеңеден тарықтырмау үшін осы жылдар ішінде демалмадым десем болады. Кейде ауысымға шығар адам болмай бірнеше күн демалмай жұмыс істеген кездерім болды. Жаңа жылда, мереке күндері жұмыста жүреміз, жұмыстың аты жұмыс. Балаларымды әжелеріне тастап, күндіз де, түнде де жанбағудың қамымен жұмыстан қалған емеспін,– деген Қызғалдақтың тек жолдасы ғана емес, өзі де теміржолшының қызы, теміржолшының немересі. Кезінде атасы Ахмет Панабеков вагон қараушы болса, әкесі Зулкаир Панабеков тепловоз жүргізген екен. Ал бүгінде вагон депосының үлкен-кішісі оны тек өз міндетіне ұқыпты, кәсібіне адал жұмыскер деп қана емес, кешегі көз көргендер жолдасымыз Жәнібектің жесірі, балаларының анасы, ошағының отын сөндірмей отырған шырақшысы деп те сыйлайды, құрметтейді екен. «Аттың орнын тай басар» демекші, Жәнібектің ұлдары да азамат болып әкелерінің орнын басар дәрежеге жетіп отырғаны осы нәзік те болса қайсар рухты келіншектің арқасы, өмір сүруге деген құлшынысы екенін бәрі жақсы түсінеді. «Орнында бар оңалар» деген осы шығар... –Жолдасым Жәнібек Маулимханов 2005 жылы осында екі вагонның арасында қалып қаза тапты. Вагонның ортасын қарап жатқанда вагондарды жіберіп қалып, 12 вагон келіп соғады. Кішкентайым сонда 11 айлық. Мамандығым мұғалім. Декреттік демалыста отырған едім. Ол оқиға қыркүйекте болса, мен қазан айынан бастап осында оператор болып жұмысқа тұрдым. Өзімді Жәнібектің ісін жалғастырып осы ұжымда болуым керек деп шештім. Бүгінде сондай әрекеттің қайталанбауы үшін пойыз хабарлануымен жолға қоршау қоямын. Кейде кейбір вагондар қалып қойып, кейіннен қосылып немесе артық болып алып тасталып жатады. Қоршау қойсам кезекшілер мұндай жұмыстарды жасай алмайды. Вагон қараушылардың өміріне де қауіп төнбейді,– дейді Қызғалдақ Панабекова. Сондай-ақ ол қай пойызға қанша уақытта қарау керек екені бойынша уақыттарын белгілеп кесте сызады. Қаралып болған вагондардың дайындығын беріп, пойыздың кететінін ескертіп, вагон қараушыларды сақтыққа шақырады. Табылған ақаулықтарды тиісті адамдарға жеткізіп, ағытылуы тиіс вагондарды компьютерге енгізеді. №1,2 жолдардан басқа 18-жолға дейін қоршау қойып, дайындығын беріп отырады. Бастысы жұмысы өзіне ұнайды. «Міндетім қоршау, кесте, хабарлау. Сол үшеуін дұрыстап атқарсам қауіп те жоқ, көңілім де тоқ», – дейді Қызғалдақ.

Орнында бар оңалар...

Читайте также

Газета Қазақстан теміржолшысы, №32-33 от 28 апреля 2026 года