Ең қатал сынақ

Новости

02.02.2018, 12:18

Өткен аптада ел аумағында қалыптасқан аса суық ауа райы Шығыстағы теміржолшыларды да біршама әбігерге салғанымен тосын оқиғасыз өтті. Бірақ, бұл – семейліктер көрмеген құқай ма?! Құбылмалы климат жағдайында жұмыс істеуге дағдыланған сала мамандары «қыс шілдесіне» күні бұрын даярлық жүргізген болатын. Соның нәтижесінде «түу» десең түкірігің жерге түспей қатып калатын суықта сала жұмысы штаттық режимнен ауытқытқан жоқ. Желі бойындағы жылыну үйшіктері, бақылау постылары, техникалық бақылау бекеттері мен байланыс және сумен қамту нысандары қажетті отынмен толық қамтылғандықтан айрықша көмек қажеттілігі туындамады. Станциялар мен мекемелер ғимараттары 38-40 градустық аязға байланысты біршама салқындап кеткендігі болмаса, теміржолшылар күнделікті жұмыс ырғағынан жаңылмады. Базбір нысандарда су құбырларының қатуы орын алғанымен, ол жылдам қалпына келтірілді. Сондай-ақ, басшылық шешімімен Семей магистральдық желі бөлімшесі қызметкерлері үшін жұмыс уақыты кешкі 17-00-ге дейін, ал жүк тасымалы бөлімшесі үшін кешкі -00-ге дейінгі уақытпен шектелді. Сол тәрізді аязға және ауа райына байланысты қоғамдық көліктер қызметінің қиындауына орай жұмыс уақыты таңертеңгі 10-00-ден басталды. –Аяз қанша қысқанмен күні бұрын дайындықтың арқасында қиналған жоқпыз, пойыздар қауіпсіздігіне нұқсан келмеді, жұмыс орындарының жылылығы мен кезекшілікке шыққан жұмысшылар қауіпсіздігі назарда болды. Бар кедергі сол – желі бойында ұйымдастырылуы тиіс жоспарға сай және жоспардан тыс белгіленген бірқатар техникалық дәрістер мен тәжірибелік мектеп сынды іс-шараларды белгісіз мерзімге кейінге шегеруге тура келді, – дейді Семей магистральдық желі бөлімшесінің еңбекті қорғау бөлімінің бастығы Жомарт Шапишев. Табиғаттың тосын мінезі салдарынан апатты жағдай орын алып немесе артық шығынға жол берілмеді. Жалпы, қаңтардың 22 күні басталған аяз тек 29 күні ғана қайтқандай болды. Әйтседе, таяу күндерге жасалған ауа райы болжамы бойынша 30 градустық аяз әлі де апта бойы сақталмақ. Сарышұнақ аязға еті үйренген шығыстық теміржолшылар үшін 20-30 градустық суықтар сөз емес десе де болғандай.

Ең қатал сынақ

Читайте также

Газета Қазақстан теміржолшысы, №32-33 от 28 апреля 2026 года