«Егер мен станция бастығы болсам...»

Новости

03.08.2016, 09:30

Жамбыл бөлімшесінде жас мамандарды ынталандыру және кәсіби тұрғыдан біліктілігін арттыру мақсатында біліктілік шаралары жиі ұйымдастырылып тұрады. Сондай байқаудың бірі теміржолшылардың кәсіби мерекесі қарсаңында «Перспективті маман» атауымен өткізілді. Шілденің 5-25 аралығында өткен байқауға барлығы 27 теміржолшы қатысты. Әрбір қатысушының өздеріне қойған талаптарын орындауын қадағалаған қазыларға ЖТ Жамбыл бөлімшесі директорының бірінші орынбасары Үмітбек Рысбеков төрағалық етті. – Жалпы, байқау шарты бойынша қатысатын мамандардың саладағы еңбек өтілі бір жыл мен отыз жыл аралығын қамту керек болатын. Алайда, өзіңіз байқағандай, байқауға негізінен жас мамандар қатысуда. Басты талап – болашағынан үміт күттіретін, перспективті маман деуге лайық жандардың кәсібилік пен білімді шеберлікпен пайдалана білуі сынға түседі. Байқауда өздеріне қойылған сұрақтарға жауап берумен қатар мамандар «Егер мен станция басшысы болсам...» тақырыбында эссе жазды. Сондағы мамандардың толғаныстары, өзіндік көзқарастары салада еңбек етіп жүрген мамандарға да ой саларлық дүниелер екен. Мысалы, байқауда жүлделі орыннан көрінген жас маманның бірі – Бурыл станциясының жүк және тауар қабылдап-өткерушісі Еркін Тұрысмағамбетов өз шығармасында бүгінгі күні ұлттық компания ең басты кіріс көзі – жүк тиелуін арттыру үшін жергілікті жүк жөнелтушілермен етене жұмыс жүргізуді көздегенін жазыпты. Ал, Хантау станциясының пойыз құрастырушысы Жәнібек Жанысбеков салада бар болғаны он ай ғана еңбек етіп келе жатқанымен бүгінгі экономикалық және әлеуметтік мәселелерге бей-жай қарамайтындығымен ерекшеленген. Тіпті, жас маман бүгінгі күні темір жолда басқару жүйесінің ескергенін, жаңа технологиялар өмірімізге дендеп енгенімен, әлі де өзгерістердің керек екендігін жазады. Міне, жас мамандардың басшылыққа барғанда лауазым қумай, осындай жаңашылдық іздейтіндігі қуантады, – дейді ЖТ Жамбыл бөлімшесі өндірістік-техникалық бөлім басшысының орынбасары Дархан Құндызбаев. Байқау қорытындысында «Станция кезекшісі» аталымы бойынша Бурный станциясының станция кезекшісі Қуанхан Қазыхан, «Жүк пен тауарды қабылдап-өткерушілер» аталымында Бурыл станциясының қызметкері Еркін Тұрысмағамбетов, «Пойыз құрастырушылар» аталымында Хантау станциясының пойыз құрастырушысы Жәнібек Жанысбеков жүлделі бірінші орындарды жеңіп алды. Олар алдағы кәсіби мерекеде марапатталмақ.

«Егер мен станция бастығы болсам...»

Читайте также