Теміржолшылар, қатарға қосыл!

Новости

10.04.2018, 16:31

2 мин чтения

Халықаралық денсаулық күні құрметіне семейлік теміржолшылар бірқатар іргелі шараларды қолға алды. Салауатты өмір салтын ұстануда осыған дейін де қоғамдық маңызы бар іс-шаралар ұйымдастырып жүрген бөлімшенің кәсіподақ комитеті мен спорт нұсқаушылары денсаулықты сақтауға шақыратын арнайы флэш-моб өткізді. Бұл күні бөлімшедегі барша теміржолшылар кең аулаға шығып, бір мезгіл бой сергіту жаттығуларын жасады. Әсем әуен аясында гимнастикалық қимылдар жасауға спорт нұсқаушысы Наталья Мешкова жетекшілік еткен болатын. Аталмыш шараға барлық мекемелердің теміржолшылары жиналды. Алдымен көпшілік алдында «ҚР теміржолшылар кәсіподағы» қоғамдық бірлестігінің Семей өңірі бойынша өкілі Алик Досанов сөз алып, барша жиналғандарды денсаулық күнімен құттықтап өтті. Сондай-ақ, спорттық шараларды өткізуде семейлік теміржолшылардың белсенді екендігін айта келіп, салауатты өмір салтын ұстануға шақыратын барлық іс-шараларға дәл осылай жаппай қатысуға үндеді. Расында, денсаулықты нығайтуға тек спорт пен гимнастикалық жаттығулар ғана емес, жарасымды әзіл-қалжың да әсер етеді. Осы орайда көпшілік алдына шыққан бөлімшенің «Жайдарман» клубы мүшелері қағытпа әзілден сыбаға тартты. Осылайша, жанға жағымды күлкі терапиясынан соң теміржолшылар бір кісідей бой сергіту жаттығуларын жасап, флэш-моб өткізді. Бір бұл емес, осы күнгі шара соңында барша жиналғандар алдында «Никотинді дәруменге» атты акция өткізіліп, шылымға әуестігі бар теміржолшылар әріптестері алдында бұл жағымсыз әдетті тастауға сөз берді. Темекіні дос тұтып келгендер шылым толы қорапты алмаға айырбастап алды. Олардың арасында қарапайым пойыз құрастырушыдан бастап бөлім басшылары, спорт нұсқаушылары да болды. Мұндай шара осыдан екі жыл бұрын да өткізілген болатын. Нәтижесінде бірқатар теміржолшылар шылымға әуестікті мүлдем доғарыпты. Осылайша, арнайы өткізілген флэш-моб денсаулық сақтау, салауаттылық мәселесінде барша теміржолшыларға ой салғаны анық. Ұйымдастырушылар осындай шаралар арқылы теміржолшыларды жаман әдеттен арылтып, салауатты өмір салтын ұстанушылар қатарына қосуды көздейтіндерін жасырмайды.

Теміржолшылар, қатарға қосыл!

Читайте также

Сейчас читают