Жаз – жолды сауықтыру маусымы

Новости

15.05.2018, 15:48

2 мин чтения

Семей жол дистанциясының теміржолшылары үшін биылғы жаз қауырт жұмыспен басталды. Жол сауықтырудағы шаралар көктемгі комиссиялық байқаудан соң күрт қарқын алды. Себебі, жыл аясында жаңа жоспарлар межеленіп, тың міндеттемелер алға қойылған болатын. Өткен жылы ПЧ-39 мекемесі Дегелең-Семей телімі бойында күрделі жөндеу жұмыстарын қарқынмен жүргізіп діттеген мезгілде аяқтаған еді. Осылайша, ағымдағы жылы Шаған мен Жалпақ станциялары аралығындағы 37,700 км болатын телім ерекше күтімге алынды. – Қыстан қысылмай шықтық. Сол себепті, биылғы даярлық шараларын да толық пысықтау қажет. Қазіргі күні жыл ауқымында атқарылатын жұмыстардың жоспарын жасап, бекітіп алдық. Техникалардан тапшылық тумайды деп сенеміз. Жазғы жол жөндеу жұмыстары қазірдің өзінде қызу жүргізіліп жатыр, – дейді Семей жол дистанциясының басшысы Рахат Ботаспаев. Жалпы, жылжымалы құрамның телімнен кідіріссіз өткізілуі үшін жолдардың техникалық талапқа сай болуы – басты міндет. Сол себептен, станциялық жолдарда да жөндеу жұмыстары іркіліссіз жүргізілуде. Бұл орайда, шаруашылық жүргізу тәсілімен 9,0 км аумақтық телім орташа жөндеуден өткізілмек. Ол үшін әрбір шақырымға 930 текше м қиыршық тас төселінбек. Қазіргі күні жалпы көлемі 9370 текше м құрылыс материалына тапсырыс берілген болатын. Сондай-ақ, биылғы жылы 4 км жолдың ескірген рельстері ауыстырылып, бірқатар ағаш бағыттамалы бұрмалар жаңартылмақ. Қазіргі күні станциялар басында ағымдық жөндеу жұмыстары да кедергісіз жүргізіліп жатыр. Әсіресе, Семей қаласының ішіндегі барлық жол өткелдері мен бұрмалар, кірме жолдар, станциядан Ертістегі теміржол көпіріне дейінгі аралық биыл толықтай жолшылардың сүзгісінен өткізілмек. Бұдан өзге телімнің ең күрделі тұсынан ұзындығы 8 км мал өтуден қорғайтын қоршаулар тұрғызылмақ. Айта кетерлігі сол, Дегелең–Семей аралығындағы бұл шаралар осымен бірнеше жыл бойы үзіліссіз жүргізіліп келеді. Жалпы, бүгінде дистанция бойынша жол сауықтыру ісінде техникадан, соңғы үлгідегі заманауи жол машиналарынан тапшылық жоқ. Ағымдағы жылы жазғы жол сауықтыру жұмыстарына РМ-8, «Унимат ФМ», «ПРБ», «ВПРС» және шпал ауыстыру үшін қолданылатын «Жейсмар» машиналары жұмылдырылмақ. Мұнымен қатар, ДМ, ПБР, ДГС сынды кешенді техникалар да көмекке келеді. – Әрине, жол қауіпсіздігін қамтамасыз ету үшін еңбекті қорғау мен технологиялық процесс тәртібін сақтау – аса қажетті мәселе. Бұл міндеттемелер аясында да жоспарлы шаралар бар. Оның біріне қысқа даярлық та кіреді. Жол сапасын арттырумен қатар алдағы қысқа да әзірлікті бастаймыз, – дейді дистанцияның бас инженері Мырзабек Керейбаев.

Жаз – жолды сауықтыру маусымы

Читайте также

Сейчас читают