Бәрі де жүлдеге лайық

Новости

26.06.2018, 12:32

2 мин чтения

Семей ЖТ бөлімшесі қызметкерлерінің балалары түрлі деңгейдегі қоғамдық шаралардан шет қалмайды. Мәселен, биыл да бірқатар өрендер ұлттық компания бойынша ұйымдастырылатын «Балауса болашақ» атты сурет байқауына қатысып, жүлде алды. Айта кетерлігі, биылғы республикалық байқау Астана қаласының 20 жылдық мерейтойына арналыпты. Тақырып аясында сынға түскен сурет туындылары арасында семейлік теміржолшылар балаларының да еңбектері мол екен. Мәселен, «Ынталандыру» аталымы бойынша 11 жастағы Арай Бағдатқызының «Астана – Отанымның жүрегі» атты майлы бояумен салған шығармасы, 6 жастағы Әмірәли Диасұлы мен 9 жастағы Іңкәр Дарханқызының елордаға арналған суреті үздік деп танылыпты. Ал, аталмыш байқау бойынша 7-10 жас аралығындағы балалар арасындағы сын бойынша Үміт Ержанқызы жүлделі орыннан табылып, сыйлыққа бағалы планшет иеленіпті. Астана төрінен жеткен осынау сыйлықты бөлімше басшысы Марлен Кәрімұлы балақайларға салтанатты түрде табыс етіп, қуантты. Бұл суреттердің барлығында да бала қиялы, дүниетанымы, Астана шаһарының балалық шақтарындағы маңыздылығы айқын байқалады. Оның үстіне бірқатары осыған дейін де республикалық сайыстарда жеңістерге жетіп жүрген, тәп-тәуір қалам тартады деуге болады. Десек те, байқауға қатысушыларының ішіндегі ең кішкентайы 5 жастағы Нұрали Кәрім бәрінен озды. Ол Астана тақырыбында салған суреті үшін «көрермен көзайымы» аталымын жеңіп алыпты. Балабақшаға баратын талабы таудай балдырған ұлттық компания өткізген аталмыш байқаудың арнайы дипломымен марапатталып, естелікке өз жасына сай бағалы ойыншықтар алды. Балаларға марапаттары мен тарту-таралғыларын табыс еткен бөлімше басшысы Марлен Көкірекбаев семейлік теміржолшылар балаларының бәрі де белсенді, бәрі де жүлдеге лайық екендігін атап өтіп, осы бағыттан таймау керектігін де құлаққағыс етті.

Бәрі де жүлдеге лайық

Читайте также

Сейчас читают