«Теміржолшы донорлар» ұйымы

Семей магистральдық желі бөлімшесі бойынша ерекше шара қолға алынды. Түрлі жағдайға тап болған теміржолшылар мен олардың жақындарына көмек көрсету мақсатында арнайы түрде қан тапсыру ісі жолға қойылды. Аталмыш тың идеяның бастамашысы әрі ұйымдастырушысы НЖС-6 бөлімшесінің еңбекті қорғау бөлімінің жетекші инженері Жомарт Шапишевтың айтуынша, ынта білдірушілер саны көп. Нәтижесінде ерікті түрде донор атанған теміржолшылар ең кемі үш айда бір реттен облыстық қан орталығына 450 грамнан қан тапсырады. – Соңғы рет Аягөз қаласында тұратын әріптесіміз үшін қан тапсыруға жиналдық. Алдын ала жасалған құлақтандыруға үн қосып, ниет білдіргендер көп болды. Жалпы, бөлімшемізде қалыптасқан ерікті «Теміржолшы донорлар» ұйымы бұл шараға әрдайым сергек қарайды. Сондықтан болар, қан тапсыруға үзбей барып тұратын әріптестеріміздің қатары көп, – дейді бастамашыл топтың жетекшісі. Негізінде Семей теміржолында қан тапсырып, қайырымдылық жасау шарасы бұрындары да болған. Тіпті, Семей магистральдық желі бөлімшесінде осы уақытқа дейін 40 реттен аса қан, 70 рет плазма өткізіп, 500 литрге жуық қан тапсырып, «Құрметті донор» төсбелгісін иеленген кең жүректі теміржолшы да еңбек етуде. – Бұл шараны тек ілгеріде аға буын қалыптастырған игілікті үрдістің жалғастығы, қайта жаңғыруы деуге болады. Сондықтан да болар, дүниежүзілік донор күнінде, түрлі акцияларда белсенділік танытушы теміржолшылар көп, – дейді магистральдық желі бөлімшесінің кадр бөлімінің басшысы Данияр Баймағұлов. Қазіргі күні бөлімше бойынша 3042 теміржолшы еңбек етуде. Оның 16 пайызын 29 жасқа дейінгі жастар құрайды. Жаңашыл бастамаға бірінші кезекте солар қолдау білдіріпті.   Қуаныш Қожаев, Семей