Ауырып ем іздегенше...

«Ауырып ем іздегенше, ауырмайтын жол ізде» дейді халық тәмсілі. «ҚТЖ» ҰК» АҚ бас кеңсе ғимаратындағы «Мейірім» медициналық кабинеті мамандары «бас ауырып, балтыры сыздағандарға» көмек көрсетуден бөлек, түрлі вирустық жұқпалы аурулардың алдын алу мақсатында іс-шаралар атқарады.   Мысалы, осы айда ақпараттық-насихаттық профилактикалық дәріс «Туберкулез ауруының алдын алу және емделу жолдары» тақырыбында өтуде. Мейірімнің ақ халатты арулары теміржолшылар қоныстанған алып ғимаратты асықпай аралап, ауру ошақтарынан сақтану, алдын алу туралы дәрістер оқып, түсіндіру жұмыстарымен айналысуда. «Мұндай шараның маңызы зор. Егер әр адам туберкулездің алдын алу жолдары мен емдеу дағдылары туралы біліп, дәрігердің кеңесін дұрыс пайдаланса, сырқаттану және өлім-жітімнің көрсеткішін азайтуға болады. «Дерттің басты факторы – иммунитеттің әлсіреуі. Дұрыс тамақтанбау, уақытылы тынықпау, салауаттылықты сақтамау, күйзеліс, суық тию сияқты жағдайлар әсер етеді. Егер бойыңызда шаршау сезіліп, екі аптадан аса жөтеліп, ұйқысыздық, асқа тәбеттің жоғалуы байқалса, бірден дәрігерге қаралу керек», – дейді  «Мейірім» медициналық кабинетінің терапевт-дәрігері Аида Байтемірова. Ал, жалпылама алғашқы медициналық көмекті көрсету үшін, мұнда барлық жағдай қарастырылған. Қан қысымын өлшеу, қажетті дәрі-дәрмекті беру, тіпті керек болған жағдайда екпе салу сынды шаралар жиі жасалады. Сапалы медициналық алғашқы көмек көрсету үшін кәсіби біліктілік тұрақты жетілдіріліп отырады. Бүгінде «Мейірім» медициналық кабинетінде терапевт-дәрігер мен екі мейірбике жұмыс жасайды. Ақ халаттылар компанияның бас кеңсе ғимаратындағы қызметкерлер  аяқасты  сырқаттанып қалған жағдайда да шұғыл жетіп, алғашқы медициналық көмек көрсетеді екен. Атап айтқанда, қан қысымының көтерілуі, қант диабеті және тағы сол сияқты. Аптаның бес күні бойы таңғы сағат 9 бен 15 аралығы денсаулық сақшысы қызметінде. Күнделікті «бас ауырып, балтыры сыздап» дегендей, түрлі мәселемен мұнда бас сұғатындар саны тәулігіне он адамға жетеді. Алдарына келген жандардың шағымын тыңдап, қан қысымын тексеріп, медициналық көмек көрсетіп, күрделі болса, қай салалық дәрігерге көріну керектігін анықтап, тереңірек ем-дом қабылдауы үшін жолдама беріледі. Алдағы уақытта жүкті әйелдер, қант диабетімен сырқаттанатын және қан қысымы жоғары адамдарға қатысты ақпараттық түсіндіру шараларын ұйымдастыру жоспарда тұр екен. Ардақ Зұлқажапқызы