Теміржолшылар топ жарды

Новости

27.09.2016, 10:31

Қыркүйек айының соңғы жексенбісінде аталып өтілетін «Еңбек күні» мерекесіне орай Астанада қала әкімдігінің, қалалық кәсіподақ орталығы және кәсіпкерлер палатасының ұйымдастыруымен «Еңбек жолы» байқауы өтіп, онда теміржолшылар жүлделі орындарды иеленді. Елбасының тапсырмасымен үш жылдан бері өткізіліп келе жатқан бұл мерекені атап өтудегі мақсат – қоғамдағы Еңбек адамының беделін арттыру, өндірістік еңбекті ынталандыру, жұмысшы кәсіптерін насихаттау, жастарды өндірістік салаға тарту, көпжылдық жұмысшы әулеттер дәстүрін нығайту болып табылады. «Үздік еңбек династиясы», «Жастардың үздік тәлімгері», «Өндірістің үздік жас маманы» аталымдары бойынша байқауға қатысуға 50 өтінім келіп түсіпті. Соның ішінен, «Үздік еңбек династиясы» аталымы бойынша темір жол саласының еңбеккерлері – Мұқашевтар әулеті үшінші орынды иеленсе, «Тұлпар-Тальго» ЖШС шебері Қуаныш Мұқышев «Өндірістің үздік жас маманы» аталымында бірінші орынды жеңіп алып, асығы алшасынан түсті. Байқау соңында барлық жеңімпаздар дипломдар және бағалы сыйлықтармен марапатталды. Үздік еңбек әулеті атанған Мұқашевтар династиясының темір жолдағы еңбек өтілі 60 жылға жуықтайды. Отағасы Сәлімгерей Мұқашев – «Жолаушылар тасымалы» АҚ Солтүстік аймақтық филиалының жолсерігі, 22 жылдық еңбек тәжірибесі бар теміржолшы. Отанасы Гүлжамал Омарова – «Вагон сервис» АҚ жолаушылар вагондарын жөндеу жөніндегі Ақмола филиалының жетекші аудармашысы, босатылмаған кәсіподақ ұйымының мүшесі, 29 жылдық еңбек тәжірибесі бар. Бірнеше рет Құрмет грамотасымен, Алғыс хатымен, ақшалай сыйақысымен марапатталған. – Жұмыс беруші мен жұмысшы арасындағы қандай да бір түсініспеушіліктерді жою, оның алдын алуда кәсіподақтың рөлі орасан деп айта аламын. Өйткені, қарапайым жұмысшылар арасында өздеріне тиесілі әлеуметтік жеңілдіктер мен құқықтық міндеттерге бей-жай қарайтындар бар. Сондықтан оларға көмектесіп, ортада жақсы қарым-қатынас орнатуға қызмет етуді өзіме міндет санаймын. Осындай қоғамдық істерге араласуым менің негізгі жұмысыма еш кедергі келтірмейді, – дейді ол. Ал ұлдары Рустам Мұқашев алты жылдан бері осы «Вагон сервис» АҚ жолаушылар вагондарын жөндеу жөніндегі Ақмола филиалының заң кеңесшісі болып еңбек етіп келеді. Мұқашевтар әулетінің тума-туыстары да темір жол саласында еңбек етеді. Атап айтқанда, Тоқжұмановтар, Омаровтар, Есіркеповтер әулеттері – темір жолда тамырын тереңге жайып келе жатқан династиялар. Ал үздік жас маман Қуаныш – темір жолдағы қазіргі қызметіне бала күнгі техникаға әуестігінің арқасында келген. М. Тынышбаев атындағы Қазақ көлік және коммуникациялар академиясын Көлік, көліктік техника және технология мамандығы бойынша тәмамдаған ол, 2012 «Тұлпар-Тальго» зауытында слесарь болып қызметін бастаған. Сол жылы Испанияға оқуға жіберіліп, вагон жинау, ішкі көрінісін реттеу жұмыстары бойынша білім алған. Кейіннен сапа бөлімінің маманы, былтырдан беру құрастыру цехының шебері қызметіне ауысыпты. Ол үшін қашан да сапалы қызмет және қауіпсіздік басты орында. Қоғамдық жұмыстарға да белсенді қатысатын жас, зауыттың кәсіподақ комитеті төрағасының орынбасары. Бүгінде отбасын құрған, екі қыздың әкесі. Осындай жүлдегерлерді марапаттаған қала әкімдігінің өкілдері олардың өмірі мен қызметін үлгі етерлік өнегелі жол деп атап өтті.

Теміржолшылар топ жарды

Читайте также

Газета Қазақстан теміржолшысы, №66 от 21 августа 2026 года