Қанат қанаттанып қайтты

Социум

27.09.2016, 17:49

«Еңбек күні» мерекесіне орай Мұнайлы ауданындағы №5 орта мектепте «Жастар.Еңбек.Инновация» тақырыбында еңбекші жастар форумы ұйымдастырылып, «Қазақстан темір жолы» АҚ филиалы «Ірілендірілген Маңғыстау жол дистанциясының» жол жөндеушісі Қанат Мұңатов аудан басшысы Нұрлан Тәжібаевтың Алғыс хатымен марапатталды. Форум – еңбек ардагерлеріне құрмет көрсету, жастардың инновациялық жұмыстарымен танысу, әр саланың қарапайым еңбекші жастарын марапаттау кезеңдерінен тұрды. Әншейінде еленбей қалатын шопан, диқан, өрт сөндіруші, шаштаразшы, аспазшы, жол жөндеуші, слесарь-жөндеуші, тоқ жөндеуші, дизайнер сынды жас мамандардың жұмыстағы еңбегі осы форумда айқын бағаланды. Сондай-ақ, бетке ұстар белсенділермен қатар ауданның 10 еңбек ардагеріне сый-құрмет көрсетілді. Олар аудандағы өндіріс орындарында, мемлекеттік, әлеуметтік, білім, денсаулық салаларында 30 жылдан жоғары еңбек етіп, зейнетке шыққан, жастарға үлгі тұтарлық өз ісінің шеберлері болатын. Осындай аға буынның ізін басқан жас теміржолшы Қанат олардан үйренері көп екендігін айтты. ─ Жолшылар мекемесінде үш жылдан бері бітірген мамандығыма сай қызмет етіп келемін. 18 жасымда еңбекке араласқалы аға толқынға шәкірт болып, жол қауіпсіздігін сақтауға күш салудамын. Темір жолдың ақауын қарап, рельстің беріктігін тексеру, барлық күтімін жасау біздің негізгі міндетіміз. Жастар арасында жұмысшы кәсібін насихаттау және жұмысшы әулетіндегі көпжылдық дәстүрді нығайту – аталмыш форумның басты мақсаты, – дейді Қанат Мұңатов. Айтуынша, өзі көп балалы теміржолшылар әулетінің кенжесі болғандықтан бақилық боп кеткен әке орнын жоқтатпай, анасына ауырлық салмас үшін жан аямай еңбектеніп келеді. Әкесі Нұрлыбай да кезінде қарапайым жолшы болған екен. Анасы Бәтима болса, Маңғыстау жүк тасымалы бөлімшесінде әлі күнге шаруашылық жағында жұмысын жалғастырып келе жатыр. Ол ұлының марапатталу сәтіне куә болып, оның келешекте бұдан да жарқын белестерді бағындыратынына, ел сенімін ақтауға ұмтылатынына қуанып қайтты.

Қанат қанаттанып қайтты

Читайте также