Қарттарға құрмет көрсетілді

Социум

04.10.2016, 18:21

Халықаралық қарттар күніне орай Маңғыстау темір жол мекемелерінің бастауыш кәсіподақ ұйымы Маңғышлақ станциясындағы «Жеңіс» мейрамханасына 100-ге тарта темір жол зейнеткерін шақырып, ақ дастарқан жайды. Қонақтар мерекелік дастарқаннан дәм татып, игі істі ұйымдастырушыларға ризашылықтарын жеткізді. Маңғыстау жүк тасымалы бөлімшесінің директоры Нәжімеден Ғұбашов, Маңғыстау темір жол бөлімшесінің бас ревизоры Болат Дүйсәлиев ардагерлерге жылы лебіздерін білдірді. ─ Қарап отырсам, абыз қариялардың бірі келместің кемесіне мініп кетсе, енді бірі, шүкір, қасымызда отыр. «Қариясы бар үйдің – қазынасы бар» демекші, балаларыңыз бен немере, шөберелеріңіздің қызығын көріп, алып бәйтеректей жайқала беріңіздер. Аман болыңыздар, сіздер салған сара жолды біздер жалғап, біздің ізімізді өскелең ұрпақ басып, елімізге еңбек етіп, дамуына үлес қоса берейік, – деген Нәжімеден Бақтығалиұлының сөзінен кейін Маңғыстау аймақтық ардагерлер кеңесінің төрағасы Амандық Алдабергенов сөйледі. ─ «Көңіл көңілден су ішеді» деген керемет бір сөз бар. Бес күндік жалған өмірде қартайғанда адамға ең керегі көңіл деп білемін. Біз асарымызды асадық, жасарымызды жасадық. Жасы ұлғайған біз сияқты қарттарға жылы қабақ пен бір ауыз ілтипатты сөз жетіп жатыр. Ал сендер құрақ ұшып, құрмет көрсетіп, кішілік танытып жатырсыздар, қазақтың осы бір қаймағы бұзылмаған ізеттілігі ұрпақтан ұрпаққа жалғасын тапсын деген бір тілек бар, – деп лебізін білдірген ардагер Маңғыстау темір жолында 700-ге жуық ардагер теміржолшы, оның ішінде 1 соғыс ардагері, 5 тыл ардагері бар екенін жеткізді. Ал бүгінде зейнеттегі Құрметті теміржолшы Қожахмет Уәзір Қазақстан темір жолының ұжымдық шартында теміржолшы зейнеткерлер назардан тыс қалмағанын, түрлі жеңілдіктер қарастырылғанын, бұл да болса, жұмыс беруші компанияның сала қызметкерлеріне, олардың ертеңіне бей-жай қарамай, қолдан келгенше көмегін беретін салиқалы саясатты ұсынған байсалды Компания екенін еске салып өтті.

Қарттарға құрмет көрсетілді

Читайте также