Ойнаймын деп, от басты...

Социум

05.10.2016, 18:15

2 мин чтения

Маңғышлақ вокзалында күзет күшейтілген. Жүктерді қараусыз қалдырмау, иесіз заттарды ішкі істер органы өкілдеріне хабарлау туралы ҚР ІІМ-нің арнайы аудиожазбасы жолаушылар назарына жиі ұсынылуда. Оған себеп, биылғы жаз маусымында Ақтөбе, Алматы қалаларында болған терактпен жарыса, Маңғыстауда «Маңғышлақ вокзалында жарылғыш зат бар» деген белгісіз біреудің қоңырау шалуы еді. Жалған ақпаратшы табылып, жазасын өтейтін болды. Бұл туралы желілік ішкі істер бөлімі басшысының орынбасары Жеңіс Әбілов Мұнайлы ауданы әкімдігі жанындағы діни бірлестіктермен байланыс жөніндегі кеңестің кезекті отырысында экстремистік ағымдардың жолын кесу, терроризмнің алдын алу бағытында жыл басынан бері атқарылған жұмыстары туралы баяндамасында мәлімдеді. –Аталған ақпаратқа қатысты жедел әрекет еткен топтың және вокзал аумағына қойылған бейнекамералардың арқасында хабардың жалған екендігі анықталды. Оны таратқан 1991 жылы туған азамат ұсталып, қылмыстық іс қозғалды. Сот шешімімен негізсіз дерекпен елді дүрліктірген тұлға 3 жыл бас бостандығынан айырылды. Үкім 7 қазаннан бастап өз күшіне енеді, – деді ол. Тәртіп сақшысының сөзіне қарағанда, бүгінде вокзал аумағында 20 бейнекамера жұмыс жасайды. Соның нәтижесінде тәртіп түзеліп, заң бұзушылықтар ізі суымай ашылуда. Жыл басынан бері 3 қылмыс дерегі осы бейнекамераға түскен көрініс негізінде әшкереленіпті. Соның бірі, ағымдағы жылдың шілде айының 9-ы күні жалған ақпаратпен жұртты әуреге түсірген телефон қоңырауы болатын. Жалған ақпар таратушы бұл әрекетін полицияның қимыл-қозғалысын байқамақ болғандығымен түсіндіріп отыр. Осы жағдайдан кейін ҰКҚ әскерилендірілген темір жол күзетінің ширақтығын шыңдау үшін темір жол вокзалында, Маңғыстау локомотив депосында, жолсеріктер үчаскесінде, жанармай беруші мекемеде арнайы оқу-жаттығуларын өткізген. Маңғыстау облыстық көліктегі ішкі істер департаментінің жедел өкілдері темір жол вокзалы мен Маңғыстау жол бөлімшесіндегі қызметкерлеріне семинар ұйымдастырған.

Ойнаймын деп, от басты...

Читайте также

Сейчас читают