Жүк тиеу көрсеткішін «Қазфосфат» пен «Еврохим» арттырды

Жамбыл жүк тасымалы бөлімшесі өткен жылы 144 690 вагонға 9 564 000 тонна жүк артқан. Демек, тәулігіне 396 вагонға 9 564 тонна жүк тиеліпті. Бұл жоспарлы міндеттеменің 100,5 пайызға орындалғанын көрсетеді. Яғни, жүк тиеу жоспары 53 131 тоннаға артық деген сөз.

 Бұл туралы бөлімшенің директоры міндетін уақытша атқарушы Дүйсенбек Сыдықов айтып берді. Оның мәліметінше, былтырғы жүк тиеу көлемін 2020 жылмен салыстырғанда да өсім бар, нақтылай айтқанда, 8 707 вагон немесе 600 657 тонна көп.

  Былтыр экспорттық тауарлар 1 719,6 мың тонна болыпты, бұл алдыңғы жылдың сәйкес кезеңімен салыстырғанда 612,3 мың тоннаға немесе 145,3 пай- ызға өскен. Бұл «Қазфосфат» ЖШС-ның сары фосфоры мен аммофосты, «Еврохим Қара- тау химиялық тыңайтқышы» ЖШС мен «ТМЗ» ЖШС-ның ферроқорытпа шығаратын өнімдері көлемінің артуы есебінен мүмкін болған. Бөлімше басшысы өткен жылы автомобиль көлігінен теміржол көлігіне 150 вагон немесе 9 000 тонна жүк тартылғанын атап өтті. Ал тасымалданатын жүктерден түскен табыс 22 млн 500 мың теңгені құраған. Тек «КТТ» АҚ-ның 50 368 вагонына жүк артылған. Д.Сыдықов бөлімшенің осы жылғы жоспарларымен де бөлісті. Айталық, «Еврохим Қаратау» ЖШС индустриялық аймақтарын дамыта отырып, шығарылатын өнім көлемін ұлғайту есебінен жүктерді тиеуді 2 пайызға, оның ішінде экспорттық қатынасты 1 пайызға ұлғайту көзделіп отыр екен. Мұнда тыңайтқыштар тасымалы шамамен 43,9 мың тоннаға арта түседі.

«Сонымен қатар «ЖЦПК» ЖШС цементін – 75,2 мың тоннаға, «Қазфосфат» ЖШС химиялық тыңайтқыштарын – 290,7 мың тоннаға, «Кнауф гипс» ЖШС гипстерін – 44,9 мың тоннаға; «Балқаштүстімет» ӨБ түсті кенін 16,5 мың тоннаға көбірек тиемекпіз», – деді ол.

«КТТ» АҚ вагон паркінің жалпы тиеу үлесін 65 пайызға дейін арттыру да жоспарда бар. Ауыр салмақты және рейстік қозғалыс үлесін 0,6 пайызға, қозғалыстың нормативтік графигі мен пойыздарды қалыптастыру жоспарының рөлін кеңейтіп, пойыздар қозғалысының нұсқалық кестесін 0,1 пайызға сақтау сынды перспективалар да жіті назарға алынады.

«Шығындарды қысқарту жөніндегі іс-шаралар мен бағдарламаларды әзірлеу және енгізу жолымен қызметтің тиімділігін ретке келтіреміз. Қозғалыс қауіпсіздігін қамтамасыз ету және еңбекті қорғау мәселелері бойынша ішкі жергілікті нор- мативтік-техникалық актілерді, нормативтік-техникалық құжаттаманы жетілдіреміз», – деді жауапты маман.