Ел аумағы арқыры Түркіменстаннан Қытайға контейнерлік пойыз жүре бастады
«Қазақстан теміржолшысы» газетінің тілшісі
Жуырда Қазақстан аумағы арқылы Түркіменстанның Ақайла станциясынан Қытайдың Цзиньхуа станциясына 40 футтық 42 контейнерден тұратын бірінші құрлықтық контейнерлік пойыздың транзиттік жөнелтілімі ұйымдастырылды.
Гипс тиелген контейнерлік пойызды Түркіменстаннан Қазақстан аумағы арқылы жөнелтуді «KTZ Express» АҚ және «Түркіменстанның көлік-логистикалық орталығы» ААҚ бірлесіп жүзеге асыруда. Түркіменстан мен Қазақстан бойынша пойыз бағдарының ұзындығы 4150 км құраса, соның 3450 шақырымы Қазақстан аумағына тиесілі болып отыр. Яғни, маршруттың 80 пайызға жуығы Қазақстан темір жолы арқылы өтеді. Қазіргі таңда алғашқы құрлықтық контейнерлік пойыз Болашақ мемлекетаралық шекаралық станциясы арқылы Қазақстан аумағына келді, енді ол Алтынкөл-Қорғас өткелі арқылы Қытайға, одан әрі қарай Цзиньхуа станциясына жөнелтілмек.
«KTZ Express» АҚ-ның «KTZE-Батыс» филиалының жұмыла жүргізген сауатты жұмысының арқасында құрлықтық контейнерлік пойыз Болашақ станциясында сәтті қабылданып, оның еліміздің аумағы арқылы еш кедергісіз жүріп өтуі жоғары деңгейде ұйымдастырылып отыр. Мамандардың айтуынша, пойыздың Қазақстан темір жолы арқылы жүрісі бес күнді құрайды. Экономикалық тұрғыдан өте тиімді бұл бағдарды пайдалану Түркіменстан мен Қазақстанның теміржол әкімшіліктерінің ынтымақтастығын дамытуға ықпал етері сөзсіз. «KTZ Express» АҚ мамандары келешекте осы бағдар арқылы контейнерлік жүк ағынын ұлғайту және де көліктік-логистикалық нарықтың жаңа қатысушыларын тарта отырып, контейнерлік пойыздың тұрақты қатынасын ұйымдастыруды жоспарлап отыр.