Шығыста вагон тапшылығын тудырмау мәселесі өзекті

Шығыста жүк тасымалын арттыру, жоспарлы шараларды мерзімінен кешіктірмей орындау бойынша бірінші кезекте вагон шаруашылығына қатысты мәселелерді реттеу қажеттілігі туындап отыр.

Алғашқы тоқсанның көрсеткіштеріне сүйенсек, жүк айналымын үзіліссіз жүргізу шаралары вагон айналымына тікелей қатысты болып отыр. Мәселен, өткен жылдың есепті мерзімімен салыстырғанда жергілікті жүк айналымын қамтамасыз етудегі қажеттілік орта есеппен алғанда 164 вагонға артқан. Оның өзі – Жаңа-Семей станциясындағы ішінара орын алатын баяу жүк тиеу процестері мен босаған вагондарды жіберуді кешіктіретін «Жылукоммунэнерго» ЖШС тәрізді мекемелердің сылбырлығын қоса алғандағы көрсеткіш. Яғни, мамандардың айтуынша, егер жүк станцияларындағы операциялар саны артатын болса, вагон тапшылығы айқын сезілуі мүмкін. Мәселен, өткен бір айдың ішінде Семей өңірінде берілген жоспар бойынша 16740 вагонға жүк тиеу қажет болған болса, нақты іс жүзінде 17002 вагон пайдаланылған. Әрі бұл көрсеткіш ай сайын өсу үстінде...

Жалпы бөлімше бойынша, әсіресе көмір жөнелтуде вагондардың қажеттілігі соңғы уақыттарда біршама өткір сезіліп отыр.

Сонымен қатар, қазіргі уақытта транзиттік пойыздарды техникалық станцияларда кідіртпей жөнелту ісі де оң көрініс табуда. Осының барлығы бөлімше бойынша вагон айналымын нақты жоспар аясында жүргізуге мәжбүрлеуде. Яғни, бұл техникалық жылдамдықты реттеу, жергілікті вагон айналымын қайта қарастыру сынды шараларға нақты өзгерістер енгізуді де талап етуде. Дегенмен қазіргі таңда шығыстағы теміржолшылар негізгі күшті босаған вагондарды уақытында жинап алуға, жүк пойыздарын жылдам құрастырып, жолға шығаруға, станциялар басында іркіліс туғызбау үшін транзиттік пойыздарды кедергісіз өткізуге күш салуда. Мұның барлығы таяу аралықта туындауы мүмкін вагон тапшылығын болдырмауға елеулі септігін тигізеді.

Вагон шаруашылығы бойынша биылғы жылдың алғашқы тоқсанында орын алған кейбір жайттар аса алаңдаушылық туғыза қоймағанымен, семейлік теміржолшылар ондай олқылықтарды алдағы уақытта болдырмауға күш салуда. Мысалы, өткен жылдың соңында көршілес бөлімшелердің кейбір жылжымалы құрамдарды қабылдамауы бірқатар келеңсіздік туғызған.

Вагон тапшылығын болдырмау, жүк пойыздарын жылдам құрастыруда көп мәселе іргелес бөлімшелерге, көмірге тапсырыс берген іргелі жылу орталықтарына да байланысты. Алайда, қазіргі таңда шығыстағы теміржолшылар мен вагон шаруашылығының мамандары ертеңге оптимистік көзқараста, биылғы жылы техникалық көрсеткіштерді арттыруға мүдделі.