Батыстағы автожолдарды салуға 3 мың вагон жұмылдырылған
«Қазақстан теміржолшысы» газетінің тілшісі
ҚТЖ автожолдың құрылыс жұмыстарына арналған жүк тасымалын ерекше бақылауда ұстап отыр. Осы мақсатта Батыс өңіріне қиыршық тасты тасымалдауға «Қазтеміртранс» АҚ паркінің 3 000 ашық вагоны жұмылдырылған, деп хабарлайды Rail-news.kz.
Вагондар айналымын жеделдету үшін Бершүгір-Орал, Кардон, Темір, Сайқын, Жәнібек учаскелері бойынша және Мұғалжар-Ноғайты, Бестамақ бағыттары бойынша тиеу-түсіру пункттерін жалғайтын 11 айналма маршрут, яғни жылжымалы құрамның тұйық контуры бойынша жүруі ұйымдастырылды. Вагондарды жылжыту, вагондарды кірме және станциялық жолдарға уақытылы жеткізу, беру, қою және жинау бойынша тәуліктік бақылау орнатылды.
Үйілме жүктерді тасымалдау бойынша өзекті мәселелерді жедел шешу үшін апта сайын жүк жөнелтушілермен, жүк алушылармен, «ҚазАвтоЖол» ҰК» АҚ өкілдерімен бейнеконференцбайланыс арқылы жиындар өткізіліп тұрады. Бұл басқосуларда қиыршық тасты тасымалдаудың жоспарланған көлемін орындау, «Қазтеміртранс» АҚ паркін ұтымды пайдалану, тасымалдаудың технологиялық және техникалық процестері мәселелері талқыланады.
Батыс Қазақстан облысының автожолдарын салу және күрделі жөндеу жөніндегі мемлекеттік бағдарлама шеңберінде автожол саласының объектілеріне, сәуір және мамыр айларында темір жол көлігімен 410 мың тоннадан астам қиыршық тас тасымалданды. Маусым айында жүк жөнелтушілер 240 мың тоннадан астам жүк тасымалдауға өтініш берген болатын. Жүк жөнелтушілердің барлық өтінімдері толық көлемде орындалуда.