Транзит: контейнерлік пойыз өтті

Маңғыстаулық теміржолшылар үшін биылғы кәсіби мереке ерекше оқиғамен есте қалатын болды. Түбек темір жолының Болашақ станциясы арқылы алғаш рет Үндістаннан шыққан транзиттік контейнерлік пойыз өтті.

Үндістан-Иран-Түркіменстан-Қазақстан-Ресей бағытымен жылжыған аталған контейнерлік пойыз Қазақстан темір жолына 6 тамыз күні қабылданып, Болашақтан әрі қарай жөнелтілді.

Төл мерекеде осындай маршруттың «тұсауын кескен» болашақтық теміржолшылар транзиттік пойызды барлық техникалық талапқа сай күтіп алып, қажетті сервистік қызметті көрсетіп, жолға салды.

– Үндістан-Иран-Түркіменстан-Қазақстан-Ресей бағытында өткен контейнерлік пойызда әртүрлі жүктер тиелген 43 контейнер болды. Пойыздың салмағы 1626 тонна, ұзындығы 57 метр, ал тиелген жүктердің жалпы салмағы 865 тонна. Үндістаннан Иранға Парсы шығанағы арқылы су жолымен келген жүк Серахс станциясынан Түркіменстанға, одан бізге жеткен. Шекаралық Болашақ станциясына 6 тамыз күні күндізгі сағат 12.33-те келді. Станцияда құрамның құжаты толық қаралып, өңделіп, вагондарға техникалық қызмет көрсетілді. Кеден, СЭС, ветеринарлық, т.б. қажетті тексерістерден өткізілген соң Ресейдің Колужская облысына жол тартты, – дейді бұл жөнінде ақпарат берген Болашақ станциясының бастығы Мақсат Нұрбеков.

Еліміз арқылы Үндістаннан Ресейге тасымалданған бұл контейнерлік жүктің құрамында азық-түлік өнімдерінен кептірілген пияз, куркума ұнтағы және басқа да түрлі заттар, атап айтқанда, керамикалық талшықтан жасалған бұрыштық модуль, ширатылған талшықтар, кастор майы, мырыш кальцийі, тот баспайтын болаттан жасалған сым, компоненттер мен техника бөлшектері, сусыз ланолин, полипропилен пленкасы, медицинаға арналған шикізаттар бар екен. Жаңа бағдармен тұңғыш рет жүріп өткен контейнерлік пойыздың жалғасы бола ма, жоқ па, белгісіз. Ал алғашқы құрам еш кедергісіз аттанды.