Биыл Жамбыл өңіріне 154,5 мың тонна көмір жеткізілді
Тараз қаласы бойынша меншікті тілші
Аймақта алдағы қысқы маусымға дайындық қызу. Жамбыл өңірінде биылғы қыста көмірге деген қажеттілік 221,1 мың тоннаны құрайды, деп хабарлайды Rail-news.kz.
Бүгінде оның 154,5 мың тоннасы жеткізілді. Жамбыл ЖТ бөлімшесі директорының логистика бойынша орынбасары Әбіл Түсіповтің айтуынша, 221,1 мың тоннаның 60,8 мың тоннасы бюджеттік мекемелерге, ал 160,3 мың тонна халыққа жеткізіледі.
– Бүгінгі күні жеткізілген 154,5 мың тоннаның 59,6 мың тоннасы – бюджеттік мекемелерге, 94,9 мың тонна халықтың қажеттілігіне орай. Сұраныс негізінен Шұбаркөл және Қаражыра көміріне басым. Қазір 28 кәсіпкерлік нысанмен келісімшартпен жұмыс жасап жатырмыз, – дейді Әбіл Алдиярәлиұлы.
Күні кеше Жамбыл облысы әкімінің орынбасары Ерболат Ибрайхановтың төрағалығымен өткен облыстық штаб отырысында өңірде көмірге деген сұраныстың 15 пайызға төмендегені сөз болды. Бұл жекелеген елдімекендердің сұйық отынға, яғни газбен жылытуға көшуіне байланысты екен.