Қызылорда станциясы жүк тиеуді межеден артық орындады

Орынбор-Ташкент магистралінің бойында жатқан Қызылорда станциясы батысқа ашылған қақпа сынды. Оңтүстіктен батысқа және кері қарай бір ғасыр бойы үздіксіз жөңкілген пойыздар легі бүгінде артпаса, толастаған емес.

Пойыздардың қозғалыс қауіпсіздігін сақтай отырып өндірістік жұмыс көрсеткіштерінің орындалуын басты назарда ұстайтын қызылордалық теміржолшылардың биылғы табысы жаман емес. Өндірістік жұмыс көрсеткіштері 103,45-147,98 пайыз аралығында орындалған. Қызылорда станциясынан жыл басынан бері 1602 вагонға 102592 тонна жүк тиеліп, жоспар 139,18 пайызды құраған.  

– Жалпы, теміржолдың жұмысы – көрінбейтін шынжырмен байланғандай, біріне-бірі тығыз байланысты құбылыс. Тасымалдау процесіне қатысатын барлық сала  бір ырғақта жұмыс істеу керек, алда-жалда біреуі істен шығып, немесе регламенттен кешіктірілуі бүкіл қозғалысқа кері әсер етеді, бір-біріне тәуелді. Сондықтан табыс та ортақ. Демек, қол жеткізіп отырған жетістіктерде тек станциялықтардың ғана емес, салалас қызметтердің де – жолшылар, байланысшылар, локомотившілер мен вагоншылардың да үлесі бар деген сөз, – дейді Қызылорда станциясы бастығының орынбасары Әмір Матжанов.  

Пандемиялық шектеулердің тыйылуына байланысты аймақ кәсіпкерлерінен тапсырыс артып, транзиттен бөлек теміржолшылар үшін жергілікті жүк көлемі де көбейген. Мәселен, биыл 1211 вагонға жүк тиеу көрсеткіші 1602 вагонға жеткізілсе, 5650 вагоннан жүк түсіру көрсеткіші 6503 вагонды құрап, меже айтарлықтай асыра орындалған.  

Жыл басынан бері пойыздық және маневрлік жұмыстар кезінде пойыздардың қозғалыс қауіпсіздігінің бұзылуына, тосын жағдайлардың орын алуына жол берілмеген. Қызылорда станциясының ұжымы осы қарқындарын жоғалтпай, биылғы жылды табысты қорытындылаудан үмітті. Еңбек өтілдері бірнеше онжылдықты құрайтын станция кезекшісі Рүстем Құрманғалиев, маневр диспетчері Ғалымжан Әбіш, пойыз құрастырушы Ақылбек Палманов, аға жүк қабылдап-тапсырушы Жәнібек Қалниязов сынды майталман теміржолшылары бар ұжым үшін бұл алынбайтын асу емес.