ҚТЖ-да астық пен ұн тасымалдау мәселеcі талқыланды
«ҚТЖ-Жүк тасымалы» ЖШС басшылығы жүк жөнелтушілермен, отандық астық және ұн экспорттаушылармен, салалық қауымдастықтар өкілдерімен кезекті кездесу өткізді. Бірлескен жұмыс тиімділігін арттыру, жүктерді өткізуді қамтамасыз ету және жеткізу мерзімдерін ұстану мәселелері талқыланды, деп хабарлайды Rail-news.kz.
Геосаяси жағдайға байланысты қолданылып келген жүк тасымалдау маршруттары өзгерді. Тасымалдау көлемінің едәуір бөлігі Каспий порттарына ауысып, Өзбекстан, Түрікменстан және Әзірбайжан бағытындағы жүктеме артты.
«ҚТЖ-Жүк тасымалы» ЖШС Бас директорының орынбасары Нұржан Келбұғанов Астық пен ұн экспортына арналған жоспарлар келісілетінін, Орталық Азия бағытында қосымша Тасымалдау жоспарларына өтінімдер қабылданатынын атап өтті.
Пойыздардың жүру жағдайын тезірек қалыпқа келтіру үшін теміржол әкімшіліктерінің барлық станцияларынан меншік және жалға алынған бос вагондарды тасымалдауға уақытша конвенциялық тыйым салынды. Мұндай шара станциялардың өткізу және қайта өңдеу қабілетін арттырып, вагон ағынын жеделдетеді.
Кеңес барысында жүк жөнелтушілер барлық сұрақтарға толық жауап ала алды. ҚТЖ астық пен ұнды, оның ішінде Ресей үшін тасымалдауға арналған транзиттік тарифке төмендету коэффициенттерін ұсынбағаны атап өтілді. Қазақстан аумағы бойынша тасымалдау базалық тариф бойынша жүзеге асырылады.