Қазақстан-Қытай: логистикалық жобаларға тың серпін
«Қазақстан теміржолшысы» газетінің тілшісі
Үстіміздегі жылдың 28 ақпанында «Қазақстан темір жолы» ҰК» АҚ Басқарма төрағасы Нұрлан Сауранбаев жетекшілік еткен делегацияның Қытай Халық Республикасына ресми сапары басталды. Қазақстандық делегация Қытайдың бірнеше теміржол компаниялары өкілдерімен кездесті.
«Қазақстан темір жолы» ҰК» АҚ мен «Қытай темір жолдары» МК басшылығының кездесуі алдымен Бейжің қаласында өтті. «Қытай темір жолдары» МК-ның басшысы Лю Чжэньфан, пандемиядан кейін Қытай тарапы қабылдап отырған алғашқы әкімшілік «Қазақстан темір жолы» делегациясы екенін атап өтті.
Кездесуде мәлім болғандай, екі ел арасындағы жүк тасымалдау көлемі оң қарқын алып отыр. Мәселен, 2022 жылы жүк тасымалы 23 млн тоннаны құрап, 2021 жылмен салыстырғанда 15%-ке артып, тарихи жоғары деңгейінен асып түскен.
Талқылау барысында Қазақстан арқылы өтетін халықаралық көлік дәліздерін дамыту мәселелері жан-жақты сөз болды. Әсіресе ҚХР-дан келетін импорт мәселесіне ерекше көңіл бөлінді. Тараптар талқылаған маңызды мәселелер қатарында Достық – Мойынты учаскесін жаңғырту және Бақты – Тачэн учаскесінде үшінші теміржол шекара өткелін салу жобаларына баса назар аударылды.
«Қазақстан темір жолы» ҰК» АҚ басшылығының Қытайға ресми сапары одан әрі Сиань қаласында жалғасты. Онда қала мэрі Ли Миньюан мырза бастаған Сиань қаласы әкімшілігі өкілдерімен кездесуде көлік бағдарлары мен инфрақұрылымды дамыту сөз болды. Сиань қаласы Қытайдың ең ірі көлік-логистикалық хабы саналады. Оның аумағында «Сиань халықаралық сауда-логистикалық паркі» құрғақ порты орналасқан. Осы құрғақ портқа жүктердің 40%-ы Қазақстаннан келеді. Сондай-ақ мұнда ҚХР – ЕО бағдарына жөнелтілетін контейнерлік пойыздардың жалпы көлеміндегі контейнерлердің 30%-і құрастырылады.
Кездесу қорытындысы бойынша келісімге қол қойылып, аталған маңызды құжат негізінде Қытай жағы қазақ теміржолшыларына Сиань қаласындағы Құрғақ порт аумағында терминал салу үшін 8 гектар жер телімін беретін болды. Сиань қаласының әкімдігі «ҚТЖ» ҰК» АҚ-ға жаңа логистикалық жобаны іске асыру бойынша қолдау көрсетуге дайын екенін жеткізді.
Ал 2 наурыз күні «Қазақстан темір жолы» мен «Үрімші темір жолы» компанияларының басшылары кездесті. Онда 2022 жылдың жұмысы қорытындыланып, 2023 жылға арналған жүк тасымалы көлемін арттыру жоспары талқыланды. Бұл басқосуда да Бақты – Аягөз теміржол желісін салу және Достық – Мойынты телімін жаңғырту мәселелері сөз болды.
Өз кезегінде қытай теміржолшылары Цзиньхе-Алашанькоу телімінде екінші жолдар құрылысы басталғанын хабарлады және Бақты – Тачэн телімінде үшінші теміржол шекаралық өткелінің құрылысы бойынша жобаны жүзеге асыруға қолдау білдіруге дайын екендіктерін жеткізді. Тараптар Үрімші қаласында қазақстандық терминалды құру мүмкіндігін қарастырып, тоқсан сайын кездесіп тұруға уағдаласты.