Маңғыстауда көмір айлығы аяқталды

Маңғыстау – еліміздегі қатты отын түрлерін тұтынбайтын, көгілдір отынмен толықтай қамтылған өңір. Аймақтың барлық ауылына газ  тартылғандықтан қарапайым халықта үйін көмірмен жылытуға сұраныс жоқ десе де болады. Қазіргі кезде облысқа жеткізілетін бұл жылу көзі тек кейбір мекемелерге ғана жеткізілуде. Сол аталған тасымалдаудағы қауіпсіздікті сақтап, өнімнің дұрыс жетуін қадағалау үшін теміржол күзеті 20 ақпан мен 20 наурыз аралығында арнайы айлық жариялапты.  

Айлық «ҚТЖ – Жүк тасымалы» ЖШС басшылығының тапсырмасымен көмір жүгінің сақталуын қамтамасыз ету бойынша «Тұрмыстық мақсаттағы көмірді тасымалдау, қабылдау кезінде тиеуді сапалы тексеру – тасымалдарды сақтаудың маңызды шарты» тақырыбымен өтті, деп хабарлады «ӘТЖК» ЖШС Атырау филиалы ШӘОТ бастығының Маңғыстау өңірі бойынша орынбасары Орынжан Жалғасбаев.  

Оның мәліметі бойынша, осы науқанда тасымалданатын көмір жүгін тиісті жеріне коммерциялық ақаусыз жеткізу мақсатында Маңғыстау станциясындағы атқыштар командасының шұғыл әрекет ететін топ қызметкерлері Маңғыстау станциясындағы желілік полиция өкілдерімен бірлесе профилактикалық және рейдтік іс-шаралар өткізген.  

«Көмір» номенкулатуралық жүгі және Маңғыстау жүк тасымалы аймағы бойынша өтетін басқа да жүк тиелген вагондар мен контейнерлердегі ұрлықтың алдын алу мақсатында теміржол қызметкерлерімен бірге жақын маңдағы елдімекен тұрғындарымен кездесіп, түсінік берген.  

– Жүргізілген кездесулерде осы аталған жүктермен байланысты түрлі құқықбұзушылықтарға жол бергендер әкімшілік және қылмыстық жауапкершілікке тартылатыны ескертілді. Онымен қоса теміржолға жақын орналасқан Дәулет елдімекеніндегі орта мектеп оқушылары және ата-аналарымен де басқосып, осы тұрғыдағы жұмыстарымызды жалғастырдық, – деген «ӘТЖК» ЖШС Атырау филиалы ШӘОТ бастығының Маңғыстау өңірі бойынша орынбасары Орынжан Жалғасбаев бүгінде түбек теміржолымен келетін көмір халықтық тұтыну мақсатында емес, тек жолаушылар тасымалының вагондары және Шетпе станциясында орналасқан цемент зауытына жеткізіліп тұрғанын айтты.