Көмір тасымалы: Деректер базасы құрылуда
«Қазақстан теміржолшысы» газетінің тілшісі
«Қазақстан темір жолы» ҰК» АҚ үшін көмір тасымалы – ең жауапты да маңызды міндет. ҚТЖ бүгінде өңірлерді көмір қорымен қамтамасыз ету ісін мониторингілеуді жетілдіруде.
«ҚТЖ – Жүк тасымалы» ЖШС-де өңірлерді көмірмен қамтамасыз ету бойынша интерактивті деректер базасы құрылуда. Онда кіреберіс жолдардың техникалық сипаттамасы, жүк түсіру қуаты, ЖЭО қоймаларында көмірдің болуы туралы мәліметтер жинақталып реттеледі, сонымен қатар көмір өндіру орындарындағы тиеу жоспары мен жұмыс тәртібі көрсетіледі. Одан басқа теміржолшылар көмір тиелген вагондардың жүгі түсірілетін кіреберіс жолдардағы қозғалыс қауіпсіздігі жағдайына аудит жүргізеді.
ҚТЖ жоспарлы түрде көмір тасымалы бойынша міндеттерді атқарады. 2023 жылы қаңтар мен мамыр айлары аралығында ҚТЖ желісі бойынша 44,3 млн тонна тас көмір тасымалданды. Экспортқа 13,2 млн тонна қатты отын жөнелтілді. Республика бойынша 31,2 млн тонна көмір тиелді. ЖЭО қоймаларына 28,4 млн тоннаға жуық қатты отын тасымалданды. Халыққа 2,7 млн тонна көмір жеткізілді. Жүк жөнелтушілерге қатысты барлық мәселелер жұмыс тәртібімен жедел шешімін табуда. Айта кетейік, әлеуметтік жүк саналатын қатты отын тасымалы бүгінде жыл он екі ай тоқтаусыз жүргізілетін болған.
Жақында Үкіметте Премьер-министр Әлихан Смайыловтың төрағалығымен өткен кеңесте көлік, байланыс және отын-энергетика кешендеріндегі бәсекелестікті дамыту шаралары талқыланды. Үкімет басшысының айтуынша, көмір нарығындағы бәсекелестікті дамыту аясында аймақтық операторларға коммуналдық-тұрмыстық көмірді тікелей жеткізуді ұлғайту және 2024 жылға қарай онымен биржалық сауда-саттық нормативін арттыру, сондай-ақ нарыққа баламалы жер қойнауын пайдаланушыларды жіберуді кеңейту жоспарланып отыр. Премьер-министр энергетикалық көмір бағасының негізсіз өсуіне жол бермеу жөнінде шаралар қабылдау қажеттігін атап өтті.