Жамбыл облысында жүк тиеу көлемі 161,8 мың тоннаға ұлғайған
Тараз қаласы бойынша меншікті тілші
Биыл Жамбыл темір жолының тарихына қатысты даталы оқиғалар көп. Атап айтқанда, Әулиеатадан Бішкекке қарай болат жолдың төселгеніне 100 жыл. Сондай-ақ стратегиялық маңызы жоғары, сол тұста іргелі құрылыс нысанына айналған Шу – Мойынты телімінің іске қосылғанына 70 жыл, ал Жамбыл бөлімшесінің құрылғанына 75 жыл толып отыр.
Ал Жамбыл өңірін химия өндірісінің алыбына айналдырған кен орнына тартылған Қаратау – Жаңатас телімі құрылысының аяқталғанына 65 жыл. Химия өндірісінің алыбы саналатын Жамбыл өңірінде жүк тасымалы да осы химия өндірісімен тікелей байланысты екені айтпаса да түсінікті.
Жамбыл жүк тасымалы бөлімшесінің директоры Молдахмет Қожахметовтің берген мәліметіне сүйенсек, ағымдағы жылдың алты айында жүк тиеу көлемі 161,8 мың тоннаға ұлғайған. Экспортқа 859,5 мың тонна жүк жөнелтілген. Бұл өткен жылдың осы мерзімімен салыстырғанда 306,25 мың тоннаға артық. Облыстағы ірі компаниялар – «Қазфосфат» ЖШС сары фосфор, аммофос, «ЕвроХим Қаратау» ЖШС химиялық тыңайтқыштар, «Тараз металлургия зауыты» ЖШС ферроқорытпа өнімдерін экспорттап отыр. Бұдан өзге соңғы жылдары аймаққа ірі инвесторлар тартылып отыр екен. Жергілікті билік оларға инфроқұрылымын тартып, тіпті темір жол тұйықтарын да салып беріп жатқан көрінеді. Бөлімше басшысы алдағы жылдары осы ірі компаниялардың есебінен жүк көлемі артады деген сенімде.
– Индустриялық аймақтағы «ЕвроХим Қаратау» ЖШС, «ЖЦПК» ЖШС, «Қазфосфат» ЖШС, «Балқашцветмет» ӨА сынды ірі компаниялардың есебінен жүк тиеуді екі пайызға көтергелі отырмыз. Сондай-ақ экспорттық айналымды да бір пайызға көтеру көзделуде. «Бірлік-2» станциясын және Сарышаған станциясындағы құм кептіру шаруашылығын қалпына келтіру жоспарланып отыр. Және «Қаратау-Жаңатас» теліміндегі 22 шақырым жолға күрделі жөндеу жұмыстары жүргізіліп, пойыздар жылдамдығын көтеру жоспарлануда, – дейді Молдахмет Ниязұлы.
Бөлімше басшысы аймақ теміржолшылары даталы жылды лайықты жетістіктермен қорытындылауға ұмтылып, Жамбыл облысының әлеуметтік-экономикалық әлеуетін көтеруге де атсалысып отырғанын жеткізді.