Құлсары станциясында жүк тиеу көлемі артты
Атырау облысы бойынша меншікті тілші
Аймақтағы ең өндірісті ауданда орналасқан бірінші класты Құлсары станциясы заман талабына сай нарық сұранысын қанағаттандырып, өлке өнеркәсібінің дамуына зор үлесін қосып келеді.
Бірнеше тарапты тоғыстырып жатқан Құлсары станциясы Мақат, Бейнеу, Атырау және Теңіз кеніші бағытында пойыздар қабылдап-жөнелтеді. Үнемі алдын алу шараларын жүргізу арқасында көп жылдар бойына пойыз және маневрлік жұмыстарда ақаусыз жұмыс жасап келе жатқан таңдаулы станцияның бірі.
Сипаты мен жұмыс көлемі бойынша бірінші класты учаскелік болып саналатын станцияда жүк және қозғалыс цехы бар.
Станция бастығының міндетін атқарушы Айнабек Бисалиевтің айтуынша, еңбек және технологиялық тәртіпті нығайту, жұмыс тиімділігін арттыру, техникалық сабақ пен адамдармен жеке жұмыс сапасын жақсарту, ұжымда еңбек және қозғалыс қауіпсіздігін, қауіпсіздік техникасы мен өндірістік санитария ережесін сақтауға аса мән беруде.
– Ұжым мүшелерінің ынтымақтаса еңбек етуі арқасында станция негізгі көрсеткіштер бойынша жоғары деңгейден көрінуде. 2022 жылмен салыстырғанда 2023 жылы жүк тиеу 152%, ал жүк түсіру 102% құрады. Осы жылдың шілде айында да жүк тиеу 163%, түсіру 139% көрсетті. Әрине, станцияға жүктелген міндет өте жауапты әрі күрделі, өйткені ол мұнай өнімдерін қауіпсіз тасымалдау және құраманың қауіпсіз қозғалысын қамтамасыз етеді, сондықтан да қозғалыс қауіпсіздігіне аса мән беріледі. Былтыр және биылғы жылы станцияға келетін біраз жолдар жаңарып қалды. Атап айтқанда, Құлсары-Бейнеу-Опорная, Құлсары-Мақат-Шоқпартоғай-Құмкөл аралығында жолдар күрделі жөндеуден өтті. Нәтижесінде жолаушылар пойызының жылдамдығы 60 км/сағ – 120 км/ сағатқа, жүк пойызының жылдамдығын 50 км/сағаттан 100 км/сағатқа көтеруге ықпал етіп отыр. Станциядағы бағыттамалы бұрмалар да жаңарды, жұмыс өнімділігі анағұрлым жақсарды, – дейді станция жетекшісі.
Құлсары станциясы өткен ғасырдың 70-жылдарында, дәлірек айтқанда 1967 жылы пайдалануға берілген, 80-жылдары «Теңіз» мұнай кенішінің дамуымен бірге станция жұмысы жандана түскен. Станция мұнай және газ тасымалдаушы маңызды арна саналып, кен орнының дамуымен өлкедегі көлік-коммуникация кешені де беки түсті. Темір жол арқылы тасымалданатын негізгі тауар өнімі – мұнай, мұнай өнімдері және химиялық жүктер. Сол себепті мұнай кәсіпшілігінің қарқынды дамуы станцияның да әрі қарай өсуі қажеттігі талабын қойды. Соған орай 8 жолдан тұратын қосымша «Б» паркі, 6 жолдан тұратын сұрыптау паркі салынып пайдалануға берілсе, «А» паркінің жолдары 1250 метрге ұзартылды.
90 жылдарға дейін станция 20 мекемеге қызмет көрсетіп, апталық жүк түсіру-тиеу көлемі 450-480 вагонды құрады. Теңіз шикі мұнайын 18 млн тонна көлемінде тасымалдауға байланысты 2007-2008 жылдары №8 разъезд бойынша мұнай өнімдері жүгі мен бос цистерналарды қабылдап-жіберу пункті ашылды. Бүгінгі таңда 27 кірме жолға қызмет көрсетіп, 120 серіктеспен қоян-қолтық жұмыс істеуде. Тәуліктік жүк тиеу-түсіру көлемі 270-290 вагонды құрап, тәулігіне 11 жұп жолаушылар, 20-25 жұп жүк пойызы өтеді. Әрине, серіктестер ішінде негізгі жүк қабылдап-жөнелтуші мекеме станциядан 10 шақырым жерде орналасқан «Теңізшевройл» ЖШС болып табылады. Құлсары станциясы көбіне осы кәсіпорын пойыздарын қабылдап-жөнелтеді. Қазіргі кезде «Теңізшевройл» ЖШС бойынша тәулігіне орташа есеппен тиелім 275 вагонды құрайды, оның ішінде мұнай және мұнай өнімдері 164, химикат – 118 вагон, тәулігіне орташа есеппен 5-6 құрама қабылдап-жіберіледі.