Өзбекстан Ақтау теңіз порты арқылы сыртқы сауда айналымын дамытып отыр
Маңғыстау облысы бойынша меншікті тілші
Өзінің бірқатар әлеуетті өнімдерін экспорттаумен Азия құрлығында ерекше орын алатын Өзбекстан еліміздің Ақтау теңіз порты арқылы сыртқы сауда айналымын дамытып отыр. Мәселен, былтыр порт арқылы өзбек еліне және кері қарай 657 ЖФБ контейнерлік жүк жөнелтілген.
Жақында Ақтау теңіз портының жұмысымен танысуға Өзбекстанның Қазақстандағы Төтенше және Өкілетті елшісі Саидикрам Ниязходжаев бастаған делегация келіп, қазақ-өзбек іскерлік ынтымақтастығы бағытындағы жетістіктері туралы сөз етті.
Мәртебелі мейманға нысанды аралатқан «АТСП» ҰК» АҚ Басқарма төрағасы Абай Түрікпенбаев, Ақтау порты инфрақұрылымының ағымдық мүмкіндіктері, сондай-ақ Өзбекстанның көлік-логистикалық секторы компанияларымен өзара іс-әрекеті туралы біраз мағлұмат берді. Сапар барысында өзбекстандық жүктердің болашақтағы көлемін тасымалдау үшін ТХКБ транзиттік әлеуетін тиімді пайдаланудың оңтайлы нұсқаларын әзірлеуді көздейтін бұрын жасалған өзара түсіністік туралы меморандум шеңберінде «Өзтемирйулконтейнер» компаниясымен өзара іс-қимыл талқыланды.
Еске сала кетсек, бұған дейін Ақтау портына Астанада өткен ҚР мен ҚХР шекаралық темір жолдары аралас комиссияларының 32-кеңесіне қатысу сапары аясында Басқарма төрағасы Гао Цзиньян бастаған Үрімші темір жолының делегациясы келген еді. Олар да Ақтау портының өндірістік қуатымен танысып, ТХКБ маршруты бойынша теңіз және теміржол көлігі арқылы өзара іс-қимылды тереңдетуге қызығушылық білдірген болатын.
Порт жұмысы өткен айда да біраз шетелдік делегацияның қызығушылығын тудырды. Тамыз айында Қазақстан мен Корея арасындағы инвестициялық және экономикалық ынтымақтастықты кеңейту шеңберінде ҚР-ның Пусан қаласындағы Бас консулдығы Пусан (ВЕРА) қаласындағы экономиканы дамыту агенттігімен бірлесіп Оңтүстік Корея іскерлік делегациясының Маңғыстау облысына сапары ұйымдастырылған еді. Делегация сапарының негізгі мақсаттарының бірі Қазақстанның батысындағы перспективалы көлік хабы ретінде Ақтау теңіз сауда портының өндірістік қызметімен толық танысу болғандықтан сапар аясында көлік және логистика саласындағы мәселелер талқыланып, екіжақты логистикалық дөңгелек үстел өтті. Өткен айда сондай-ақ Ақтау портына USAID кеңесшілер тобының да сапары ұйымдастырылды. Орталық Азиядағы сауда бойынша USAID (TCA) бағдарламасының халықаралық және қазақстандық сарапшылары Ақтау портының өндірістік-техникалық мүмкіндіктері және оны одан әрі дамытудың стратегиялық жоспарларымен танысты. Ал жалпы ТСА сарапшылары келуінің мақсаты ТХКБ өткізу қабілетін дамыту және арттыру бойынша ҚР ИИДМ-мен бірлескен Жол картасын іске асыру мәселелерін талқылау болды.
Онан бөлек Ресей Федерациясының Қазақстандағы Төтенше және Өкілетті Елшісі А.Н.Бородавкин және бүкіл әлем бойынша бірқатар ірі порттарды салу және пайдалану есебінде тұрған ірі құрылыс және инвестициялық компания – қытайлық China Harbor Engineering Company Limited (CHECK) өкілдері де келіп кеткен болатын. Кездесулер барысында «АТСП» ҰК» АҚ Басқарма төрағасы Абай Түрікпенбаев теңіз портының инфрақұрылымдық объектілерімен және өндірістік үдерістерімен, сондай-ақ Ақтау портының өткізу қабілетін жылына 22,8 млн тоннаға дейін, оның ішінде 300 мың ЖФЭ контейнерге дейін ұлғайтуға мүмкіндік беретін даму жобаларының ағымдағы жай-күйін таныстырды.