Астық керуені Ақкөлден басталады

Теміржол бойындағы жүздеген станция-бекеттердің әрқайсысының өзіндік орны мен міндеті бар. Ақмола жүк тасымалы бөлімшесіне қарасты Ақкөл станциясы еліміздің астық өнімдерін экспортқа жөнелтуде жетекші роль атқаратын ерекше статусқа ие.

Ақкөл жұмыс сипатына қарай учаскелік станция болып саналса, жұмыс көлеміне қарай 3-класты теміржол бекетіне жатады. Ақмола – Қарталы теміржолының құрылысымен 1928 жылдары ашылған станция 1887-1997 жылдар аралығында Алексеевка аталған, бүгінгі Ақкөл елдімекенін жанай өтеді. Тың көтерілген жылдардан соң Қазақстан астығын әлемге таратып, экспорттық тасымалдың табысын арттырған станцияға айналды.  

– Станциядан жөнелтілетін негізгі жүк әрине солтүстіктің бидайы. Айналамыз толған элеваторлар, тек егін піскен күздегі жиын-терім кезінде емес, жыл он екі ай бидай тиеу мен жөнелту тоқтаусыз жүреді. Сонымен қатар металл сынығы, қиыршық тас, ағаш материалдары, картоп, тағы басқа ауыл шаруашылығы өнімдері республиканың өзге өңірлері мен шетелдерге экспортталады. Контейнерлік пойызбен Қытайға да жүктер, соның ішінде бидай жөнелтіледі. Қазіргі таңда айына 150 вагон жөнелтіп, 160 вагон түсіріп отырмыз, оның ішінде көмір және мұнай өнімдері бар. Латвия мен Польшадан малға құрама жем, егіншілік үшін тыңайтқыштар, малға керек дәрілер, Литвадан ауыл шаруашылығына техникалар жеткізіліп, біздің станциядан түсіріледі. Ақкөлде 9 жол бар, соның екеуі басты жол, қалғандары жүк тиеу-түсіру мен қабылдауға арналған. Сонымен қатар жеке кәсіпкерлердің жүктерін тиеп-түсіріп, жөнелтетін 14 тұйық бар, соның ішінде өзіміздің 3 элеватор жұмыс істейді, – деп мәлімет берді Ақкөл станциясының бастығы Нұрбол Назаров.  

Теміржол тасымалын тасқындатып, сонымен қатар бүкіл бір облыстың ауыл шаруашылығын дамытуға үлес қосып отырған Ақкөл станциясында осындай ауқымды жұмыстарды небәрі 24 теміржолшы атқарып отыр екен. Олардың бесеуі – станция кезекшісі, тағы бесеуі – пойыз құрастырушылар, екеуі – тауар кассирлері, төртеуі – жүк қабылдаушы. Ақкөл нағыз тоғыз жолдың торабында орналасқан станция болғандықтан Астанадан басқа облыстар мен елдерге және керісінше басқа жақтан елордаға бағыт алатын транзиттік жүк және жолаушылар пойыздары түгел өтеді. Тәулігіне 12 жұп жолаушылар пойызы, 50 жұп жүк пойызы өтеді.  

Станция бастығы Нұрбол Назаров «Қозғалыс қауіпсіздігі үшін» төсбелгісін алған, жас та болса тәжірибелі теміржолшы. Биыл күзгі байқау барысында жұмысты жоғары деңгейде ұйымдастырғаны үшін бөлімше бастығының Алғыс хатын алған.