Әйтеке би станциясында 500 вагон астық тиелді
Ақтөбе облысы бойынша меншікті тілші
Биыл Ақтөбе облысының егінді алқаптарында дәнді дақыл толық жиналмай қалды. Күз айындағы үздіксіз жауған жауын диқандар жұмысын қиындатқан. Мәселен, астықты аймақ саналатын Әйтеке би ауданында алқаптың 60 пайызы ғана жиналған.
Әйтеке би станциясы биылғы тоғыз айда 489 вагонға дәнді дақылды тиеуді жүзеге асырған. Олар көрші Ресей және Өзбекстан елдеріне жөнелтілген. Егін шаруашылығымен айналысатын диқандар тиеу жұмыстарына қатысты қиындық жоқ екенін айтады.Теміржол тұйықтары жаз бойы астық тиеу вагондарымен қамтылған. Тапсырыс бойынша қоймадағы астықтарды жөнелтіп отырады.
– Барлық жағдай бақылауда. Астық тиеу, вагонмен қамтамасыз ету жұмыстарында кедергі жоқ, тоғыз айда тиелген 500 вагонға жуық астық Кавказ, Самарқанд және Карши станцияларына жөнелтілді. Бұдан бөлек 436 вагон саз тиеу жұмыстары ұйымдастырылып, 234 вагон құрылыс материалдары жөнелтілді, – деді Әйтеке би станциясының басшысы Жандос Әбдіжәлелов.
Ақтөбе өңіріндегі егін жинау жұмыстары Жіңішке, Жазық, Әйтеке би, Мәртөк, Ақтөбе станцияларында жүрді. Ақтөбе жүк тасымалы бөлімшесінің мәліметінше, биыл сегіз айда 2408 вагонға 160 мың тоннадан аса астық тиелген. Өткен 2022 жылдың осы уақытында 2 088 вагонға141 мың тоннадан аса астық тиеліп, тасымалданған болатын. Жалпы, аймақта егін егумен 15 ірі серіктестік, 107 шаруашылық айналысады.140 мың гектар алқапқа дән себілген.
Биылғы егін орағы маусымы Үкіметтің тұрақты бақылауында тұр. Премьер-министр егін жинау науқанын қаржылай және материалдық-техникалық жағынан қамтамасыз ету үшін барлық қажетті шаралар қабылдауды тапсырды.