Құлсарыда жүк көлемі артты

Аймақтағы ең өндірісті ауданда орналасқан бірінші класты Құлсары станциясы аймақтың теміржол көлігіне сұранысын қанағаттандырып, өлке өнеркәсібінің дамуына елеулі үлес қосып келе жатыр.

Тораптық станция арқылы тасымалданатын негізгі тауар – мұнай өнімдері және химиялық жүктер. Тәуліктік жүк тиеу-түсіру көлемі 270-290 вагонды құрап, тәулігіне 11 жұп жолаушылар, 10-15 жұп жүк пойызы өтеді. Станция бүгінгі таңда 27 кірме жолға қызмет көрсетіп, 120 серіктесімен қоян-қолтық жұмыс істеп жатыр. Әрине, серіктестер ішінде негізгі жүк қабылдап-жөнелтуші мекеме станциядан 10 шақырым жерде орналасқан «Теңізшевройл» ЖШС. Құлсары станциясы негізінен осы мұнай алпауытына қызмет көрсетіп, пойыздарын қабылдап-жөнелтеді. Қазіргі кезде «Теңізшевройл» ЖШС бойынша тәулігіне орташа есеппен тиелім 275 вагонды құрайды, оның ішінде мұнай және мұнай өнімдері – 164, химикат – 118 вагон, тәулігіне орташа есеппен 5-6 құрама қабылдап-жіберіледі.  

Құлсары учаскелік станциясының жүк және қозғалыс цехы бар. Станция бастығы Жүсіп Қалихановтың айтуынша, еңбек және технологиялық тәртіпті нығайту, жұмыс тиімділігін арттыру, техникалық сабақ пен адамдармен жеке жұмыс сапасын жақсарту, ұжымда еңбек және қозғалыс қауіпсіздігін, қауіпсіздік техникасы мен өндірістік санитария ережесін сақтау сынды жұмыстарға ерекше басымдық беріледі. Станция Мақат, Бейнеу, Атырау және Теңіз кеніші бағытында пойыздар қабылдап-жөнелтеді. Үнемі алдын алу шараларын жүргізу арқасында көп жылдар бойына пойыз және маневрлік жұмыстарда ақаусыз жұмыс жасап келеді.

– Әрине, станцияға жүктелген міндет өте жауапты әрі күрделі, өйткені ол мұнай өнімдерін қауіпсіз тасымалдау және құраманың қауіпсіз қозғалысын қамтамасыз етеді, сондықтан да қозғалыс қауіпсіздігіне аса мән беріледі. Өткен 10 айда тәулігіне 13 пойыз қабылданып-жөнелтілді. Былтырғы жылдың осы кезеңімен салыстырғанда биыл жүк тиеу 115%, ал жүк түсіру 119 %-ды құрады. Яғни жоспарлы межеден артық екенін көреміз. Жоспар бойынша 71 490 вагон, 3 863 215 тонна жүк тиелу керек болса, орындалғаны 81 940/4 198 326 вагон/тонна. Тәуліктік жүк тиеу 235/12 708 тонна, орындалуы – 270/13 830 тонна. Жүк түсіру де жоспар бойынша 9935 вагон болса, түсірілгені – 11 860. 10 айда жергілікті табыс 132 552 772 теңгені құрады, – дейді ол. Станциядағы құжат айналымы да дұрыс жолға қойылған. Тауар кассирінің автоматтандырылған жұмыс орнына (АРМ ТВК) сәйкес, 10  айда  жалпы рәсімделген құжаттардың саны 129 482 орын, 251 жөнелту хабары, 32 486 тасымалдау құжаты берілген, – деп мәлімет берді станция бастығы.

Айта кетерлігі, былтыр және биылғы жылы станция жолдары біршама  жаңарып қалды. Құлсары-Бейнеу-Опорная, Құлсары-Мақат-Шоқпартоғай-Құмкөл аралығында жолдар күрделі жөндеуден өтіп, бағыттамалы бұрмалар да ауыстырылды. Нәтижесінде жолаушылар пойызының жылдамдығын 60 км/сағ – 120 км/сағатқа, жүк пойызының жылдамдығын 50 км/сағаттан 100 км/сағатқа көтерілді.