Су тасқынынан зардап шеккен аудандарға теміржол арқылы құрылыс материалдары жеткізілуде
Ақтөбе облысы бойынша меншікті тілші
Ақтөбе облысында су тасқынынан зардап шеккен аудандарға теміржол арқылы құрылыс материалдары жеткізілуде.
Тұрғын үйлер мен бүлінген инфрақұрылым нысандарына қажетті материалдар тасымалданып, құрылыс қарқынды жүріп жатыр.
«Ойыл ауданына құрылыс материалдары біздің станция арқылы жеткізілуде. Қазір Бейнеуде тиеу жұмыстары аяқталды. Қиыршық тас, цемент күтіп отырмыз. 40, 41 жолдарда түсіріледі», – деді Шұбарқұдық станциясының бастығы Алтай Абдуллин.
Ойыл ауданы – Ақтөбе облысында су тасқынынан ең көп зардап шеккен аймақтардың бірі. Мұнда екі ауыл толықтай жаңадан салынады. Шұбарқұдық станциясы Ойылға ең жақын және жолы жақсы. 150 шақырымдық жолмен жүк көліктері бір сағатта жетеді.
Ал Ақтөбе өңірінде теміржол нысандары су тасқыны кезінде зардап шеккен жоқ. Алдын алу шараларының уақытылы жүруінің арқасында темір жол бойын су шайып кету болмады және пойыз қозғалысына кедергі келмеді. Темір жол бойына жақын орналасқан 16 бөгет пен су қоймаларын қалпына келтіру жұмыстарын жергілікті билікпен бірлесіп жүргізді.