Жамбылда жүк тасымалы 12 пайызға өсті
"Қазақстан теміржолшысы" газетінің Жамбыл облысындағы меншікті тілшісі
«ҚТЖ-Жүк тасымалы» ЖШС Жамбыл бөлімшесінің алғашқы жартыжылдықтың қорытындысы бойынша табысы, қозғалыс қауіпсіздігін қамтамасыз етудегі көрсеткіштері, сонымен қатар еңбеккерлерге жасалып жатқан әлеуметтік-моральдық қолдау шаралары туралы филиал директоры Айдын Сейітбенбетов айтып берді.
– Айдын Пайзылдаұлы, бөлімше жұмысының негізгі көрсеткіші – жүк тасымалының ахуалы қалай? Кәсіби мерекеге қандай нәтижемен келдіңіздер?
– Жаман емес, алғашқы алты айда жүк тасымалынан түскен табыс 22 656 735 138,8 теңгені құрады. Былтырғы көрсеткішпен салыстырмалы түрде 12 пайызға өсті. Алғашқы алты айға Директорлар кеңесі Жамбыл бөлімшесі бойынша жоспарға 4 көрсеткіш енгізген. Соның бірі – жүк тиеу. Мысалы, филиал бойынша бірінші жартыжылдықта техникалық жоспар бойынша 320 вагон, 21357 тонна жүк тиеу керек болса, орындалғаны - 361,32 вагон, тиелген жүк - 24498,9 тонна немесе техникалық жоспар 114,7 пайызды құрады. Директорлар кеңесінің бекіткен жүк тиеу жоспарында тәулігіне орта есеппен 454 вагон 30417,58 тонна тиеу керек деп бекітілген. Бөлімшенің көрсеткіші – Директорлар кеңесінің бекіткен жоспарының 80,54 пайызын құрайды. Филиалдың негізгі жүк артушылары – «Казфосфат» ЖШС және осы серіктестікке қарасты «Жаңа фосфор зауыты», «Балхаштүстіметалл», «Еврохим Қаратау», «Жамбыл өндірістік цемент компаниясы» жарты жылдағы негізгі жүк тиеу жоспарына сай тәулігіне бар-жоғы 282,5 вагон, немесе 18 500 тонна тиейміз деп мәлімдеме жасаған. 100 пайыздық нәтижені көрсете алмауымыздың себебі осында жатыр. Дегенмен, жалпы табыс деңгейінің көтерілуіне жүк жөнелтушілермен жүк тасымалдау көлемін ұлғайту және тапсырыс берушіге бағдарлануды арттыру бойынша бірлескен жұмыстарды жүргізу арқылы қол жеткізгенімізді атап өткен жөн.
– Алдағы жартыжылдықтың жоспарына да тоқталып өтсеңіз?
– Жұмыс жемісті болу үшін алдағы мақсаттарды айқындап алу қажет. Меже белгіленгенде ғана нәтижеге жету мүмкін болмақ. Біз алдағы алты айда жүк тиеуді қазіргі көрсеткіштен 5 пайызға арттыруды жоспарлап отырмыз. Мысалы, «Еврохим Қаратау» ЖШС индустриялық аймақтарын дамыта отырып шығарылатын өнім көлемін 43,9 мың тоннаға, «Жамбыл өндірістік цемент компаниясында» – 75,2 мың тоннаға, «Қазфосфат» ЖШС бойынша 290,7 мың тоннаға көбейтіп, экспорттық қатынастағы жүк тасымалын 3,5 пайызға ұлғайтуды, «КТТ» АҚ вагон паркінің жалпы тиеудегі үлесін 57 пайызға дейін арттыруды көздеп отырмыз. Сонымен қатар, пойыздардың тартымы бойынша отын-энергетикалық үлестік шығынын азайтуға бағытталған жұмыстарды жүргізіп, энергия ресурстарын үнемдеуге қол жеткізсек дейміз. Сондай-ақ алдағы айларда Мойынты – Шу – Алматы телімінің өткізу қабілетін, пайдалану жағдайын жақсарту мақсатында Бірлік-2 станциясы қалпына келтіріледі, Көктөбе, Алаайғыр станцияларында диспетчерлік съездер салынады. Жоспарда бұдан басқа да ауқымды жобалар бар. Оның бәрін тізе берудің жөні жоқ, кезінде көретін боласыздар.
– Еңбек өнімділігін жақсарту үшін еңбеккерге жасалатын материалдық-моральдық қолдаудың маңызды рөл атқаратыны белгілі...
– Теміржолшылардың әлеуметтік жағдайын жақсартуға айтарлықтай деңгейде көңіл бөлініп отыр дей аламын. Ұжымдық шартқа сәйкес барлық игіліктерді пайдаланып отыр. Биылғы өткізіліп жатқан әлеуметтік іс-шаралардың барлығы Қазақстан теміржолының 120 жылдығы аясында өтуде. Мерекеге орай өз міндеттерін жауапкершілікпен атқарып, ерен еңбегімен ерекшеленген 71 адамды түрлі марапаттарға ұсындық. Олардың арасында бірнеше қызметкеріміз «Құрметті теміржолшы» атанса, бірқатары «Адал еңбегі үшін» төсбелгісімен, «Кәсібі бойынша үздік», «Үздік маман» қатарынан көрінді. «Қазақстан теміржолы» ұлттық компаниясы» АҚ Басқарма төрағасының Құрмет грамотасы мен Алғыс хаттарына ие болып, мерейі өскен мамандар да жоқ емес. Жастарды әлеуметтік-қоғамдық жобаларға тартып, филиалда жастар саясатын дамытуға назар аударып отырмыз. Олардың мансаптық өсуі үшін көшбасшылық қасиеттерді дамытуға арналған жастар форумдары мен тренингтерге қатысуына жағдай жасалуда. Оқытудың жаңа әдістерін, оның ішінде іскерлік ойындарды, тренингтерді, себеп-салдарлық диаграммаларды, ситуациялық схемаларды, бейнесюжеттерді пайдалана отырып, техникалық сабақтарды өткізудің жаңа нысандарын игеруі – басты назарда. Осы мақсат-міндеттерді орындау үшін филиалдың әлеуметтік-экономикалық міндеттерін шешуде инновациялық рационализаторлықты қолдау арқылы филиал қызметкерлерінің шығармашылық әлеуетін пайдалану көзделуде. Сонымен қатар, аймақ теміржолшылары Бурабайдағы ҚТЖ-ға қарасты Сейфуллин шипажайына жыл бойы жолдамамен барып, ем-дом алу мүмкіндігіне ие, одан бөлек «Ақ тілек», «Ақсу демі», «Балқаш», «Қазақстан kz», «Сосновый бор» шипажайларына жеңілдікпен жолдама алып, денсаулықтарын шыңдауда.
– Әңгімеңізге рахмет!